त्र्यंबकेश्वर मंदिरालगत साकारतेय सुसज्ज दर्शनवारी

भाग्यश्री मुळे
त्र्यंबकेश्वर : सिंहस्थ कुंभपर्वास प्रारंभ झाला असून, देशाच्या कानाकोपर्‍यातून भाविक मोठ्या संख्येने त्र्यंबकला भेट देत आहे. कुशावर्त तीर्थावर स्नान करणे, ब्रšागिरी, गंगाद्वार, त्र्यंबकेश्वर मंदिर आदि ठिकाणांना भेटी देणे असा शिरस्ता भाविक राबवित आहेत. मंदिरात होणार्‍या गर्दीला नियंत्रित करण्यासाठी त्र्यंबकेश्वर मंदिरालगत सुसज्ज दर्शनबारी तयार होत आहे. एक एकर जागेत सीमेंटचे वॉलकंपाऊंड, पत्र्यांचे शेड, वीज, पाणी आदि सुविधांयुक्त दर्शनबारीचे काम अंतिम टप्प्यात आले आहे. ध्वजारोहण सोहळ्यानंतर कुंभमेळा सुरू झाला असल्याने आणि शाहीपर्वणी दरम्यान होणार्‍या लाखोंच्या गर्दीत स्नान, दर्शन अशक्य ठरू शकण्याची शक्यता असल्याने मोठ्या प्रमाणात भाविक त्र्यंबकला येऊ लागले आहे. त्र्यंबकेश्वर मंदिराच्या बाहेर लांब लांब रांगा लागत असल्याने आणि पाऊस, थंडी यामुळे भाविकांचे हाल होत असल्याने मंदिराच्या पूर्व दरवाजालगतच्या एक ते दीड एकर जागेचे सपाटीकरण करून तेथे वॉटरप्रूफ मंडप घालून, त्यावर पत्रे बसवून दर्शनबारी केली जात आहे. अर्ध्या दर्शनबारीचे काम पूर्ण झाले असून, सिंहस्थ काळात भाविकांची गैरसोय यामुळे टळणार आहे. या दर्शनबारीत एकाचवेळी एक ते दीड हजार लोक नंबर लावून थांबू शकतील, अशी व्यवस्था होणार आहे. ही दर्शनबारी सुरू झाल्यावर त्र्यंबकेश्वर मंदिरासमोरून दर्शनाची रांग बंद केली जाणार आहे.
पुरातत्व खात्याच्या निर्देशनानुसार मंदिर परिसरातील १00 फूट जागेत कोणतेही बांधकाम करण्यास परवानगी नसल्याने आणि त्र्यंबकेश्वर मंदिराच्या मागील बाजूस गोदावरी नदी वाहत असल्याने नदीकिनारी बांधकाम करणे योग्य ठरत असल्याने ही दर्शनबारी सिंहस्थ कुंभमेळ्यानंतर सहा महिन्यांत काढून टाकण्यात येणार आहे. त्यामुळे सध्या जरी सिंहस्थ कुंभमेळ्यात भाविकांची गैरसोय टळणार असली तरी नंतर मात्र ऊन, पाऊस, वारा सोसातच भाविकांना त्र्यंबकराजाचे दर्शन घ्यावे लागणार आहे.
कोट
एक ऑगस्टपर्यंत दर्शनबारीचे काम पूर्ण होईल. जवळपास सहा महिन्यांसाठी ही दर्शनबारी येथेच असण्याची शक्यता आहे. त्र्यंबकेश्वर देवस्थान ट्रस्ट दर्शनबारीत सर्व सोयीसुविधा देणार आहे.
- चंदर वाघिरे, साईश्रद्धा मंडप, नाशिक