गुजरात टी प्रोसेसर्स अँड पॅकर्स लिमिटेडचे कार्यकारी संचालक पराग देसाई (Parag Desai) यांचं वयाच्या 49 व्या वर्षी अहमदाबाद येथील एका खासगी रुग्णालयात निधन झालं आहे. गुजरात टी प्रोसेसर्स अँड पॅकर्स लिमिटेड हे त्यांचा प्रतिष्ठित चहा ब्रँड - वाघ बकरी चहासाठी सर्वात लोकप्रिय आहे.
पराग देसाई 15 ऑक्टोबर रोजी त्यांच्या घराजवळील इस्कॉन रोडजवळ मॉर्निंग वॉकसाठी बाहेर पडले असताना त्यांच्यासोबत दुर्घटना घडली. भटक्या कुत्र्यांनी हल्ला केल्याचं म्हटलं जात आहे. यानंतर त्यांच्या डोक्याला गंभीर दुखापत झाली, त्यामुळे त्यांना ब्रेन हॅमरेज झालं.
देसाई यांना त्यानंतर उपचारासाठी अहमदाबाद येथील खासगी रुग्णालयात नेण्यात आलं. मात्र त्यांची प्रकृती अधिकच बिघडल्याने त्यांना हेबतपूर रोडवरील दुसऱ्या एका खासगी रुग्णालयात हलवण्यात आलं.
देसाई यांच्या कुटुंबातील जवळच्या सूत्रांनी दिलेल्या माहितीनुसार, त्यांच्यावर तातडीने शस्त्रक्रिया करण्यात आली आणि त्यांना जवळपास सात दिवस व्हेंटिलेटरवर ठेवण्यात आलं. त्यानंतर देसाई यांचे रविवारी सायंकाळी निधन झालं आहे.