त्या भित्र्यांना पुरुष म्हणवण्याचा अधिकारी नाही - विराट कोहली

बंगळुरू तरुणी छेडछाड घटनेवरुन क्रिकेटर विराट कोहलीनं संताप व्यक्त करत बघ्याच्या भूमिकेत असणा-या समाजाला फटकारले आहे.

ऑनलाइन लोकमत

मुंबई, दि. 6 - नवीन वर्षाच्या पूर्वसंध्येला बंगळुरूमध्ये तरुणींची छेडछाड काढल्याच्या नीच कृत्याविरोधात देशभरातून संताप व्यक्त केला जात आहे. क्रिकेटर विराट कोहलीनंही या घटनेविरोधात चीड व्यक्त करत स्त्री-पुरुष असा भेदभाव करणा-यांना खडेबोल सुनावले आहेत. 

 

'हा देश सर्वांसाठी सुरक्षित आणि समान असायलाच हवा. महिलांना वेगळी वागणूक दिली जाऊ नये. एकत्र येऊन अशा घृणास्पद घटनांविरोधात उभे राहू', असं ट्विट करत विराट कोहलीनं बंगळुरू छेडछाड घटनेविरोधात संपात व्यक्त करणारा व्हिडीओ शेअर केला आहे.   

(बंगळुरुत 1500 पोलिसांच्या डोळ्यादेखत महिलांची छेडछाड)

ही घटना घडत असताना काही जण केवळ बघ्याच्या भूमिकेत होते, त्यांनाही विराटने फटकारले आहे. 'बघ्याच्या भूमिकेत असणा-यांना स्वतःला पुरुष म्हणण्याचा काहीही अधिकारी नाही', असेही त्यांनी या व्हिडीओमध्ये म्हटले आहे.  

(VIDEO : बंगळुरु छेडछाड प्रकरण - सीसीटीव्हीत कैद झालं नीच कृत्य)

'जरी हीच घटना तुमच्या कुटुंबातील सदस्यासोबत घडली असती तरी देखील तुम्ही असाच तमाशा पाहिला असता का?', असा प्रश्नही विराटने उपस्थित केला आहे. 

(VIDEO : बंगळुरूच्या घटनेनं माझं रक्त खवळलं - अक्षय कुमार)

 

तसंच 'तरुणी-महिलांनी कोणते कपडे घालायचे हे त्या स्वतः ठरवतील, शिवाय अशा घटनांसाठी तरुणींना जबाबदार ठरवले जात आहे, ही बाब फार लज्जास्पद आहे', असं सांगत विराटने अशा घटनांवेळी हाताची घडी तोंडावर बोट ठेवणा-या समाजाला या व्हिडीओच्या माध्यमातून फटकारले आहे. 

 

This country should be safe & equal for all. Women shouldn't be treated differently. Let's stand together & put an end to such pathetic acts pic.twitter.com/bD0vOV2I2P— Virat Kohli (@imVkohli) 6 January 2017

Change your thinking and the world will change around you. pic.twitter.com/FinDIYv2aV— Virat Kohli (@imVkohli) 6 January 2017

काय आहे घटना -

31 डिसेंबरच्या रात्री एमजी रोड आणि ब्रिगेड रोडवर नवीन वर्षाच्या स्वागताचं सेलिब्रेशन करण्यासाठी हजारो लोक जमा झाले होते. यामध्ये महिला आणि लहान मुलांचाही समावेश होता. रात्री 11 वाजता काही हुल्लडबाजांनी महिलांना हात लावण्यास आणि टिप्पणी करण्यास सुरुवात केली. धक्कादायक बाब म्हणजे परिसरात 1500 पोलीस तैनात असतानाही हा प्रकार घडला. या घटनेचे फोटो समोर आले असतानाही कोणताच गुन्हा दाखल करण्यात आलेला नव्हता. हुल्लडबाजांनी अर्धी रात्र झाल्यानंतर सगळ्या सीमा पार केल्या आणि महिलांना हवं तिथे स्पर्श करण्यास सुरुवात केली. महिलांचा विनयभंग होत होता. परिस्थिती एवढी बिघडली होती की जमलेल्या तरुणी, महिलांनी सँडल, चपला हातात घेऊन मदतीसाठी धावण्यास सुरुवात केली.

कोणताही गुन्हा नोंद नाही -

घटनेचे फोटो समोर आल्यानंतर तसंत प्रत्यक्षदर्शी असतानाही पोलिसांनी मात्र अजून कोणताच एफआयआर दाखल झालं नसल्याचं सांगितलं होते. आश्चर्याची गोष्ट म्हणजे उपायुक्त संदिप पाटील यांनी 'महिलांची कुटुंबियांशी चुकामूक झाली होती, त्यांचा शोध लागत नसल्याने मदत मागत होत्या,' असा दावा केला आहे. विनयभंगाचा कोणताच गुन्हा दाखल केला गेला नसल्याचं त्यांनी सांगितलं.

महिलांचे कपडे काढून केला विनयभंग -

सुरक्षेसाठी तैनात करण्यात आलेल्या पोलिसांनी दिलेली माहिती मात्र वेगळीच होती. चर्च मार्गावर तैनात एका महिला पोलिसाने 'काही हुल्लडबाजांनी दारुच्या नशेत असलेल्या महिलेचे कपडे काढून तिची छेड काढल्याचं', सांगितलं. पोलिसांनी दिलेल्या माहितीनुसार एमजी आणि ब्रिगेड रोडवर 1500 पोलीस कर्मचारी तैनात होते.

नेत्यांची जीभ घसरली -

कर्नाटकचे मंत्री जी परमेश्वर यांच्यासोबतच अबू आझमी यांनी महिलांनी तोकडे कपडे घातले की अशा घटना होतात असं धक्कादायक वक्तव्य केलं आहे. राष्ट्रीय महिला आयोगाने याप्रकरणी नोटीस पाठवून स्पष्टीकरण मागितलं आहे.