ऑनलाइन लोकमत -
हैदराबाद, दि. 21 - अल्पवयीन मुलांनी भटक्या कुत्र्याच्या 3 पिल्लांना जिवंत जाळल्याची धक्कादायक घटना समोर आली आहे. तरुणांपैकी एकाने या घटनेचं चित्रीकरण केलं होतं. हा व्हिडिओ सोशल मिडियावर व्हायरल झाल्यानंतर हा प्रकार उघडकीस आला. मुशीराबादमधील पठाणवाडी परिसरात ही घटना घडली आहे. पोलिसांनी या विकृत 7 मुलांना ताब्यात घेतलं असून समुपदेशनासाठी पाठवण्यात आलं आहे.
व्हिडिओमध्ये दिसत असल्याप्रमाणे ही मुलं काही वेळ त्या पिल्लांशी खेळत होती आणि त्यानंतर मस्ती म्हणून जवळच आग पेटवली. त्यानंतर मुलांनी शेपटीला धरुन त्या पिल्लांना ओढत नेलं आणि आगीत फेकून दिलं. मस्तकात आग पेटवणारी आणि ह्रद्य पिळवटून टाकणा-या या घटनेचा व्हिडिओ एका व्यक्तीने फेसबुकवर अपलोड करण्यात आला आहे. या व्हिडिओमध्ये त्या पिल्लांच्या ओरडण्याचा आवाज स्पष्ट ऐकू येत आहे.
अशाच काही घटना -
ही पिल्लं आगीतून बाहेर येण्याचा प्रयत्न करत होते. पण या मुलांनी पुन्हा काठीच्या सहाय्याने त्यांना आगीत ढकललं आणि जळताना पाहत राहिले. प्राणीमित्राने हा व्हिडिओ पाहिल्यानंतर मुशरीबाद पोलीस ठाण्यात तक्रार दाखल केली. सर्व मुलं अल्पवयीन असून त्यांना समुपदेशनासाठी पाठवण्यात आल्याचं पोलिसांनी सांगितलं आहे.
याअगोदरही काही दिवसांपुर्वी एमबीबीएसच्या दोन विद्यार्थ्यांनी एका कुत्र्याला तीन मजली इमारतीवरुन खाली फेकल्याचा व्हिडिओ व्हायरल झाला होता. गौथम सुदर्शन आणि आशिष पॉल या दोघांना यानंतर चेन्नई पोलिसांनी अटक केली होती.