सारांश...

नायब तहसीलदारावर कारवाई
नागपूर : नायब तहसीलदाराच्या वाहनाला दिवा नाही. असे असतानाही सोमवारी मध्यप्रदेशातील एक नायब तहसीलदार वाहनावर निळा दिवा लावून फिरत असताना प्रादेशिक परिवहन कार्यालय (आरटीओ) शहरने कारवाई केली. आरटीओच्या वायु पथकाने स्वत: समक्ष दिवा काढला व नोटीस बजावली आहे.

मेडिकल फुल्ल
नागपूर : पावसाळा सुरू होताच विविध आजारांमुळे मेडिकलचे वॉर्ड फुल्ल झाले आहे. स्त्री रोग विभाग, बालरोग विभाग व अस्थिरोग विभागात खाटा अपुऱ्या पडत आहेत. विशेषत: प्रसुतीसाठी आलेल्या अनेक महिलांना खाट मिळत नसल्याने जमीनीवर गादी टाकून उपचार घ्यावे लागत आहे.

सार्वजनिक नळाचा दुरुपयोग
नागपूर : शहरात तहान भागविण्यासाठी महानगरपालिकेने ठिकठिकाणी सार्वजनिक नळाची सोय करून दिली. परंतु सध्याच्या स्थितीत बहुसंख्य ठिकाणी याचा दुरुपयोग होत असल्याचे दिसून येते. विशेषत: मेडिकलच्या मागील वसाहतीतील नळांना तोट्या नाहीत, पाण्याचा अपव्य होतो. अनेकवेळा या पाण्याचा उपयोग वाहन धुण्यासाठी होत असल्याचे दिसून येते.

नुकसान भरपाईची मागणी
नागपूर : मानेवाडा रोडवरील न्यू नेहरूनगर वसाहतीत ड्रेनेज लाईन नाही. यातच ही वसाहत खोलगट भागात आहे. यामुळे शनिवारी ५०वर घरांमध्ये पाणी शिरून अन्नधान्यासह इलेक्ट्रॉनिक वस्तू खराब झाल्या. घरात पाणी आल्याने नागरिकांना रविवारची रात्र जागून काढावी लागली होती. नुकसान भरपाईची मागणी या भागातील नागरिकांनी केली आहे.

मेडिकलच्या आत श्वानांचा धुमाकूळ
नागपूर : स्वच्छतेला घेऊन शासकीय वैद्यकीय महाविद्यालय व रुग्णालयाचे कौतुक होत असताना दुसरीकडे मोकाट श्वानांना पाहून आश्चर्य व्यक्त केले जाते. विशेष म्हणजे हे श्वान वॉर्ड क्रमांक २२, २३च्या परिसरात नेहमीच दिसून येतात.