छेडछेडीला कंटाळून युवतीची आत्महत्या

- अकोला जिल्ह्यातील घटना
चिखलगाव/सायखेड (जि.अकोला) : छेडछेडीला कंटाळून एका युवतीने विहिरीत उडी घेऊन आत्महत्या केल्याची घटना रविवारी बार्शीटाकळी तालुक्यातील जलालाबाद येथे उजेडात आली. या प्रकरणी तिच्या कुटुंबियांनी छेड काढणार्‍या युवकांविरुद्ध कठोर कारवाईची मागणी केली आहे.
जलालाबाद येथील ही युवती चिखलगावमध्ये शाळेत इयत्ता १०वीत शिकत होती. काही दिवसांपासून गावातील तीन युवक तिची छेड काढत होते. सुरुवातीला तिने याकडे दुर्लक्ष केले. हा त्रास असह्य झाल्याने शनिवारी रात्री उशिरा तिने गावातील विहिरीत उडी घेऊन आत्महत्या केली. रविवारी दुपारी युवतीवर शोकाकुल वातावरणात अंतिमसंस्कार करण्यात आले. शवविच्छेदन अहवालानंतर पोलीस पुढील कारवाई करणार आहेत. (वार्ताहर)
----
पीडित युवतीच्या वडिलांनी आठ दिवसांपूर्वीच या टवाळखोर युवकांची समजूत काढण्याचा प्रयत्न केला होता. मात्र, त्या युवकांनीच त्यांच्याशी वाद घातला होता.