ऑनलाइन लोकमत
कानपूर, दि. २९ - चोर असल्याच्या संशयातून जमावाने एखाद्या व्यक्तीला मारहाण केल्याची घटना आपण नेहमीच ऐकतो. पण उत्तरप्रदेशमधील कानपूर येथे चक्क दहशतवादी असल्याच्या संशयावरुन जमावाने एका अज्ञात व्यक्तीची हत्या केल्याची घटना समोर आली आहे.
कानपूरमधील महाराजपूर येथे पाकिस्तानी दहशतवादी लपल्याची अफवा पसरली होती. रविवारी परिसरातील नागरिकांना एक अनोळखी व्यक्ती फिरताना आढळला होता. परिसरातील काही जणांनी त्याच्या चौकशीला सुरुवात केली. यादरम्यान काही जणांनी त्याला थेट काठीने मारहाण केली. परिसरातील अन्य नागरिकही यात सामील झाले व या सर्वांनी मिळून त्या व्यक्तीला काठीने बेदम मारहाण केली. मारहाणीत त्याचा मृत्यू झाल्यानंतर जमावाने त्या व्यक्तीचा मृतदेह नदीत फेकण्याचा प्रयत्न केला. मात्र तोपर्यंत पोलिस घटनास्थळी पोहोचल्याने जमावाने मृतदेह तिथेच सोडून पळ काढला. मृत व्यक्ती हा मुस्लीम असल्याचे स्पष्ट झाले असले तरी त्याची ओळख अद्याप पटलेली नाही. याप्रकरणी पोलिसांनी नऊ जणांना अटक केली असून अन्य आरोपींचा शोध सुरु असल्याचे पोलिसांनी सांगितले.