अधिवेशन-कॉलम

विधिमंडळ कॉलम
.................................
कदमांचा क्रमांक
पर्यावरणमंत्री रामदास कदम यांना विधानसभेत सातव्या क्रमांकाचे आसन देण्याचा निर्णय यापूर्वी झाला असताना मंगळवारी विधिमंडळ सचिवालयाकडून त्यांना यांना आठव्या क्रमांकाचे आसन देण्याचा फतवा जारी झाल्याने कदम यांचं माथं गरम झालं. गृहनिर्माणाबरोबर तात्पुरते संसदीय कामकाज हे खाते ताब्यात आलेल्या प्रकाश मेहता यांनी मध्येच आपला क्रमांक लावण्याचा प्रयत्न केल्याने कदम यांचा क्रमांक घसरला! राज्य मंत्रिमंडळाच्या बैठकीतील आणि विधानसभेतील आसनव्यवस्था मंत्र्यांच्या ज्येष्ठतेनुसार ठरते. कोण कुणाच्या अगोदर मंत्री झाले, कोण राज्यमंत्री होता तर कोण कॅबिनेट दर्जाचा मंत्री होता, कुणाची कितवी टर्म सुरु आहे, अशा बाबी क्रमांक निश्चित करताना महत्वाच्या ठरतात. मेहतांचा क्रमांक वरचा लावायचा तर शिवसेनेच्या परिवहनमंत्री दिवाकर रावते किंवा रामदास कदम यांचाच क्रमांक घसरणार आहे. कदम यांचा चढलेला पारा पाहून त्यांचा क्रमांक तोच ठेवायचा तर रावते यांचा सामना विधिमंडळ सचिवालयाला करायला लागणार.(हे म्हणजे इकडे आग तर तिकडे फुफाटा)
...........................................
उदयोन्मुख कलावंत
राष्ट्रवादी काँग्रेसचे आमदार जितेंद्र आव्हाड हे आपल्या लीलांमुळे मीडियाच्या पडद्यावर स्थान मिळवतात. त्यांच्या उक्ती व कृतीवरून टीका झाली तरी पडदा तेच व्यापतात. त्यामुळे त्यांच्यातील कलाकाराचे गेल्या आठ महिन्यांत महाराष्ट्राला दर्शन झाले होते. मात्र काँग्रेसचे अमिन पटेल हे आपले सुप्त अभिनय कौशल्य गेले पंधरा वर्षे सत्ता असल्याने दाखवू शकले नव्हते. मंगळवारी विधान भवनातील मुख्य प्रवेशद्वारापाशी पथनाट्यात पटेल यांची प्रमुख भूमिका होती. भास्कर जाधव यांना विधानसभेचे अध्यक्ष करण्यात आले (जाधव यांना नाटकातही अध्यक्षपद देण्याची ही सुनील तटकरे यांची खेळी असावी) पटेल हे अध्यक्षांसमोर सत्ताधार्‍यांची भूमिका वठवत होते. त्यानंतर चिक्की खाऊन मृत झालेल्याबद्दल पटेल शोक करीत होते तर तिकडे आव्हाड चिक्की खाऊन आपला टीआरपी घसरू नये याची काळजी वाहत होते. (पंकजा मुंडे यांनी कुटुंबनियोजनाच्या गोळ्यांत भ्रष्टाचार केल्याचा आरोप झाले असते तर आव्हाड यांनी काय खाल्ले असते अशी शंका भाजपाच्या एका आमदाराने उपस्थित केली.) नाटक असो की वास्तव काही कायम सत्ताधार्‍यांच्या भूमिकेचे कलावंत असतात तर काही विरोधकांच्या भूमिकेतील. त्याचे प्रत्यंतर आले.
..............................................
पत्रकार उद्धव ठाकरे
उद्धव ठाकरे यांच्यात दुहेरी व्यक्तीमत्व असल्याचा गौप्यस्फोट महसूलमंत्री एकनाथ खडसे यांनी केल्याने महाराष्ट्राला धक्का बसणे स्वाभाविक आहे. शिवसेना पक्षप्रमुख उद्धव ठाकरे आणि पत्रकार उद्धव ठाकरे ही दोन भिन्न व्यक्तीमत्वे असल्याचे खडसे यांचे मत आहे. पत्रकार ठाकरे हे सरकारवर टीका करतात, मंत्र्यांना बोचकारतात. पक्षप्रमुख ठाकरे यांच्याशी भाजपाचे सौहार्दपूर्ण संबंध असल्याची ग्वाही खडसे यांनी दिली. पत्रकाराचे काम टीका करणे हे आहेच. यापूर्वी शिवसेनेच्या मुखपत्रातील अग्रलेख ठाकरे लिहित नसल्याने त्या टीकेकडे लक्ष देण्याची गरज नाही, अशी भूमिका भाजपा घेत होती. मात्र दररोज टीका होत असल्याने आता उद्धव यांच्यातील पत्रकार ही टीका करीत असल्याचा साक्षात्कार भाजपाला झालाय. (उद्धव हे विधिमंडळाचे वृत्तांकन करण्याकरिता पुढील आठवड्यात येणार असल्याची चर्चा पत्रकार गॅलरीत सुरु झाली आहे.)
संदीप प्रधान