दोघांना अटक : धावत्या बसमध्ये तरुणीवर बलात्कार
बंगळुरू : कर्नाटकच्या बंगळुरू जिल्ह्यात दिवसाढवळ््या धावत्या बसमध्ये एका १९ वर्षीय तरुणीवर बलात्कार करून तिला बसमधून बाहेर फेकून देण्यात आल्याची धक्कादायक घटना उघडकीस आली आहे. याप्रकरणी बसचाचालक आणि क्लीनरला अटक करण्यात आली आहे. होसकोटे या ग्रामीण भागातील सुलीबेले येथे गुरुवारी ही घटना घडली.बंगळुरू शहरात महिलांविरुद्ध अत्याचाराच्या घटना वाढल्या असून, गेल्या महिन्यातच एका २२ वर्षीय बीपीओ कर्मचारी तरुणीवर व्हॅनमध्ये सामूहिक बलात्कार करण्यात आला होता. त्यापाठोपाठ ही घटना घडली आहे. पोलिसांनी दिलेल्या माहितीनुसार, पीडित तरुणी सकाळी ७ वाजता कामावर जाण्याकरिता या बसमध्ये बसली होती. त्यावेळी वाहनचालक आणि क्लीनरशिवाय बसमध्ये कुणीही नव्हते. वाहनचालकाने बसच्या क्लीनरला बस चालविण्यास सांगितले आणि तिच्यावर अत्याचार केला. नंतर एका निर्जन ठिकाणी पीडितेला बसमधून फेकून दोघेही फरार झाले. पीडित तरुणी उपचारासाठी हॉस्पिटलमध्ये गेली. तिच्या तक्रारीवरून पोलिसांनी बसचालक आणि क्लीनर या दोघांनाही अटक करून बस ताब्यात घेतली. (वृत्तसंस्था)सरकार अशा घटना कदापि सहन करणार नाही आणि गुन्हेगारांवर कायद्यानुसार त्वरित कारवाई होईल. - जी. परमेश्वरा, गृहमंत्री, कर्नाटक