ऑनलाइन लोकमत
नवी दिल्ली, दि. २१ - मोदी सरकारच्या निकटचे मानले जाणारे व काँग्रेसवर टीकास्त्र सोडणारे योगगुरू रामदेव बाबा यांनी आता मात्र यू-टर्न घेऊन मोदींच्याच मंत्र्यावर टीका केली आहे 'मोदींचे मंत्री अहंकारी झाले आहेत' अशी टीका करताना रामदेव बाबा यांनी काँग्रेस उपाध्यक्ष राहुल गांधी यांच्यावर मात्र स्तुतीसुमनांचा वर्षाव केला आहे.
एका वृत्तवाहिनीला दिलेल्या मुलाखतीदरम्यान रामदेव बाबांनी मोदींचे कौतुक केले मात्र त्यांच्या सरकारमधील कांही मंत्र्यांवर ते नाराज दिसले. 'मोदींच्या सरकारमधील मंत्री अंहकारी झाले आहेत. भाजपाध्यक्ष अमित शाह, अर्थमंत्री अरुण जेटली यांनी त्यांचे नंबर बदलले आहेत, जे अत्यंत चुकीचे आहे. त्यांनी जनतेच्या संपर्कात राहून त्याचं म्हणणं ऐकलं पाहिजे. काहीतरी काम केलं पाहिजे, काही काळाने का होईना परत निवडणुका लढवायच्या आहेत हे त्यांनी (मंत्री) लक्षात ठेवले पाहिजे' असे रामदेव बाबा म्हणाले.
तर दुसरीकडे त्यांनी राहुल गांधी यांचे कौतुके केले. 'राहुल यांनी निष्क्रिय काँग्रेसमध्ये प्राण फुंकले आहेत. पराभवानंतर काही काळ अदृश्य झालेला काँग्रेस पक्ष राहुल यांच्यामुळे पुन्हा (सक्रिय) दिसू लागला आहे. विकास व शेतक-यांच्या मुद्यावरून सरकारला घेरण्यात काँग्रेस यशस्वी ठरला आहे. त्यामुले शेतक-यांचा विश्वास जिंकण्यासाठी मोदी सरकारला नव्या योजना आखाव्या लागणार आहेत', असा सल्लाही रामदेव बाबांनी दिला.