ऑनलाइन लोकमत
हैदराबाद, दि. 10 - अयोध्यामध्ये राम मंदिर बांधण्यावरून वादग्रस्त विधान करणारे भाजपाचे आमदार राजा सिंग यांच्याविरोधात गुन्हा दाखल करण्यात आला आहे. जर कोणी राम मंदिर बांधण्याचा विरोध केला तर त्याचा शिरच्छेद करू असं ते म्हणाले होते. हैदराबादमध्ये एका कार्यक्रमात बोलताना त्यांनी हे वक्तव्य केलं होतं.
मजलिस बचाओ तेहरीक या स्थानिक संघटनेचे अध्यक्ष अमजेद उल्लाह यांच्या तक्ररीवरून हैदराबाद पोलिसांनी राजा सिंग यांच्याविरोधात गुन्हा दाखल केला आहे. चिथावणीखोर आणि धार्मिक भावना भडकावणारं विधान केल्याबद्दल आयपीसी 295A नुसार त्यांच्यावर डाबिरपूरा पोलिसांनी गुन्हा दाखल केला आहे.
"राम मंदिर बांधल्यास गंभीर परिणामांचा सामना करावा लागेल असं म्हणणा-यांना मी सांगू इच्छितो, आम्ही तुमच्या अशाच विधानाची वाट पाहत होतो, जेणेकरून आम्ही तुमचा शिरच्छेद करू शकतो" असं ते म्हणाले होते.
यापुर्वीही राजा सिंग यांनी चिथावणीखोर वक्तव्य केली आहेत. राजा यांनी मध्यंतरी फेसबुकवर व्हिडीओ टाकून दलितांना मारहाण करण्याचं समर्थन केलं होतं. जे दलित गोमांस खातात आणि गायींची हत्या करताता त्यांना अशाच प्रकारे मारहाण केली जावी असं ते म्हणाले होते.
राम मंदिर प्रकरण-
6 डिसेंबर1992 मध्ये बाबरी मशीद पाडण्यात आल्यानंतर हे प्रकरण न्यायालयात गेलं. अजून या प्रकरणी न्यायालयाने निकाल दिलेला नाही. याप्रकरणी न्यायालयाबाहेर तोडगा काढावा, असा सल्ला काही दिवसांपूर्वीच सर्वोच्च न्यायालयाने दिला होता तसेच याप्रकरणी मध्यस्ती करण्याची तयारीदेखील सर्वोच्च न्यायालयाने दाखवली. बाबरी मशीद पाडल्याप्रकरणी भाजपचे ज्येष्ठ नेते लालकृष्ण अडवाणी, मुरली मनोहर जोशी, उमा भारती यांच्यासह 14 जणांवर खटला सुरु आहे. राम मंदिर आणि बाबरी मशिदीचा वाद अनेक वर्षांपासून प्रलंबित आहे.