पुत्तिंगल मंदिर अग्निकांड नियमांच्या उल्लंघनामुळे?

ज्वलनशील किंवा स्फोटक पदार्थ हाताळण्याच्या संदर्भातील सर्व नियम धाब्यावर बसविण्यात आल्याची आणि खबरदारीच्या मूलभूत उपायांकडे दुर्लक्ष करून आतषबाजीवरील बंदी

कोल्लम : ज्वलनशील किंवा स्फोटक पदार्थ हाताळण्याच्या संदर्भातील सर्व नियम धाब्यावर बसविण्यात आल्याची आणि खबरदारीच्या मूलभूत उपायांकडे दुर्लक्ष करून आतषबाजीवरील बंदी आदेशही पायदळी तुडविण्यात आल्याची गंभीर बाब पुत्तिंगल देवी मंदिर अग्निकांडाच्या दुसऱ्या दिवशी उघडकीस आली आहे. केरळ उच्च न्यायालयानेही दुर्घटनेची गंभीर दखल घेतली असून, अतिउच्च आवाजाच्या वा तसा परिणाम घडवून आणणाऱ्या फटाक्यांवर राज्यातील सर्वच मंदिरात बंदी असावी, असे मत न्यायमूर्तींनी व्यक्त केले आहे. लोकांना आपल्या धर्मानुसार पूजाअर्चा करण्याची पूर्ण परवानगी राज्यघटनेने दिली असली तरी धोकादायक अशा फटाक्यांचा वापर करावा, असा त्याचा अर्थ नाही,असे न्या. चिदम्बरेश यांनी म्हटले आहे.न्यायालयाच्या रजिस्ट्रारना त्यांनी या संदर्भात पत्रही पाठवले आहे. दरम्यान, न्यायालयाच्या देवस्थानांबाबत निर्णय घेणाऱ्या खंडपीठाकडे मंगळवारी हे प्रकरण येणार आहे. त्यावेळी फटाक्यांच्या वापरावर निर्णय होण्याची शक्यता आहे. मंदिरातील दुर्घटनेला अपवाद म्हणता येणार नाही, यापूर्वीही असे प्रकार घडले आहेत, असे नमूद करून, माणसामुळे होणाऱ्या दुर्घटना टाळ्यासाठी कडक पावले उचलावीच लागतील, असे न्या. चिदम्बरेश यांनी म्हटले आहे.पोलिसांनी मंदिर व्यवस्थापनाच्या पदाधिकाऱ्यासह सहा जणांविरुद्ध गुन्हा दाखल केला आहे. मात्र व्यवस्थापनातील सर्व पदाधिकारी बेपत्ता असून, ते पळून गेले आहेत की स्फोटांत ते जखमी झाले वा मरण पावले, हे अद्याप स्पष्ट झालेले नाही.‘स्फोटकांच्या बाबतीतील नियमांचे सर्रास उल्लंघन करण्यात आल्याचे दिसते. आतषबाजीसाठी वापरण्यात आलेल्या स्फोटकांचा तपास करण्यासाठी आम्ही येथे आलो आहोत. फटाके बनविणाऱ्या निर्मात्यांनी प्रतिबंधित रसायनांचा वापर केला. याशिवाय खबरदारीच्या मूलभूत नियमांकडेही डोळेझाक करण्यात आली आहे,’ असे मुख्य स्फोटक नियंत्रक सुदर्शन कमल यांनी म्हटले आहे. दरम्यान फटाक्यांच्या आतषबाजीला परवानगी देणे अथवा न देण्यासाठी आपल्यावर कुणीही दबाव टाकला नाही. मी केवळ माझे काम केले, असे कोल्लमच्या जिल्हाधिकारी ए. शायनामोल यांनी स्पष्ट केले. तर आतषबाजीवर घातलेल्या बंदीचे उल्लंघन करण्यात आले आहे. कुणी उल्लंघन केले, याचा तपास केला जात आहे, अशी माहिती अतिरिक्त जिल्हाधिकारी शाहनवाज यांनी दिली.फटाक्यांच्या आतषबाजीला परवानगी नाकारण्यात आल्याच्या आदेशाची प्रत व्हायरल झाली आहे. पुतिंगल देवस्थान व्यवस्थापन समितीचे सचिव जे. कृष्णकुट्टी पिल्लई यांनी अतिरिक्त जिल्हाधिकाऱ्यांकडे हा अर्ज केला होता. पण तो फेटाळण्यात आला. फटाक्यांच्या आतषबाजीवरील बंदी आदेशाचे उल्लंघन करणाऱ्यांविरुद्ध कायदेशीर कारवाई केली जाईल, असे या आदेशात नमूद केले आहे. ८ एप्रिल रोजीच हा आदेश जारी करण्यात आला होता. दरम्यान पुत्तिंगलजवळच्या अत्तिंगल येथे एका ठिकाणी साठवून ठेवण्यात आलेला १०० किलो स्फोटकांचा साठा पोलिसांनी जप्त केला. (वृत्तसंस्था)आतषबाजीवर बंदी नसल्याचा देवस्थाने मंडळाचा दावा थिरुवनंतपुरम : मंदिर परिसरात फटाक्यांची आतषबाजी करण्यावर प्रतिबंध नाही, असा दावा, केरळमधील १२५५ मंदिरांचे व्यवस्थापन करणाऱ्या त्रावणकोर देवस्थाने मंडळाचे अध्यक्ष प्रायार गोपालकृष्णन यांनी केला आहे. आतषबाजी हा पूजाविधीचा एक भाग आहे आणि त्यावर बंदी घालण्यास आमचा विरोध आहे, असे ते म्हणाले.थिरुवनंतपुरमच्या रुग्णालयात सोमवारी तीन जखमींचा मृत्यू झाला. आणखी ३८३ जणांवर विविध रुग्णालयांत उपचार सुरू आहेत.चौकशीसाठी पाचजण ताब्यात११० भाविकांचा बळी घेणाऱ्या अग्निकांडाच्या संदर्भात पुत्तिंगल मंदिर देवस्वम कमिटीच्या पदाधिकाऱ्यासह सहा जणांविरुद्ध गुन्हा दाखल करण्यात आला आहे. पाचजणांना चौकशीसाठी ताब्यात घेण्यात आले आहे. पोलिसांनी त्यांची ओळख मात्र सांगितली नाही. या सहा जणांविरुद्ध भादंविच्या कलम ३०७ आणि ३०८ अन्वये गुन्हा दाखल करण्यात आला. या प्रकरणी मंदिर परिसरात स्पर्धात्मक आतषबाजी आयोजित करणारे सुरेंद्रन आणि कृष्णाकुट्टी या दोन कंत्राटदारांना आरोपी बनविण्यात आले आहे.