ऑनलाइन लोकमत
नवी दिल्ली, दि. ३ - राष्ट्रीय स्वयंसेवक संघ व भाजपा नेत्यांच्या बैठकीच्या पार्श्वभूमीवर पंतप्रधान नरेंद्र मोदी ही संघाच्या हातची कठपुतळी आहे अशी बोचरी टीका काँग्रेसने केली आहे. केंद्रातील सर्व मंत्री संघासमोर कामाचा आढावा देत असून हे सरकार संघाला बांधील आहे की देशातील जनतेला असा सवालही काँग्रेसने उपस्थित केला आहे.
दिल्लीत संघ व भाजपाच्या वरिष्ठ नेत्यांमध्ये आढावा बैठक सुरु असून आज या बैठकीचा दुसरा बैठक आहे. या बैठकीला पंतप्रधान नरेंद्र मोदीही उपस्थित राहण्याची शक्यता आहे. या पार्श्वभूमीवर काँग्रेसने भाजपावर टीका केली आहे. केंद्र सरकारचा रिमोट कंट्रोल मोदींकडे नसून संघाकडे आहे, मोदी हे भागवत यांच्या हातची कठपुतळी आहे असे काँग्रेस नेते मनिष तिवारी यांनी म्हटले आहे.
दरम्यान, यापूर्वी भाजपाने माजी पंतप्रधान मनमोहन सिंग यांच्यावर सोनिया गांधींच्या हातची कठपुतळी असल्याचा आरोप केला होता. आता काँग्रेसनेही मोदींवर कठपुतळीचा आरोप केला असून यावर भाजपा नेत्यांकडून कोणतीही प्रतिक्रिया आलेली नाही.