पान १ - सणासुदीच्या उंबरठ्यावर महागाईचा आगडोंब

सणासुदीच्या उंबरठ्यावर महागाईचा आगडोंब
मनोज गडनीस
मुंबई : सणासुदीचे दिवस तोंडावर असताना महागाईने पुन्हा एकदा डोके वर काढले आहे. एकिकडे दुष्काळसदृष्य परिस्थितीमुळे मागणी व पुरवठ्याचे गणित विस्कळीत झाल्यामुळे भाजीपाला, धान्य, कडधान्य, फळे अशा सर्वच दैनंदिन गरजेच्या घटकांच्या किमतीमध्ये किमान ४० ते कमाल ६० टक्के वाढ झाली असून आगामी काळात या किमती आणखी किमान १० टक्क्यांनी भडकण्याचे संकेत मिळत आहेत.
राज्यासह देशावर दुष्काळाची छाया परसली असल्याने याचा मोठा फटका सध्याच्या उत्पादनाच्या पातळीवर असलेल्या घटकांना बसत असून याची परिणती थेट महागाई भडकण्याच्या रुपाने होत आहे. बाजारात फेरफटका मारल्यास कांदा ६० रुपये, टॉमेटो ४० रुपये, गवार ६० रुपये, भेंडी ४८ रुपये, सिमला मिरची ८० रुपये तर पालेभाजीदेखील ३५ रुपये ७० रुपयांच्या दरम्यान पोहोचली आहे. कडधान्यांच्या किमती किमान ४० रुपयांच्या घरात आहेत. तर डाळीच्या किमतीनेही शंभरी गाठली आहे, अशा परिस्थितीत आगामी काळात आणखी किमती भडकण्याचे संकेत मिळत आहेत.

-----------------
देशांतर्गत परिस्थितीही जवाबदार
केवळ दुष्काळ नव्हे तर अर्थकारणाच्या पातळीवर विचार केला तर निर्यात रोडावली असून चलनवाढीचे प्रमाण आवाक्यात नाही. तसेच, आंतरराष्ट्रीय बाजारात तेलाच्या किमती कमी होत असल्या तरी अमेरिकी डॉलरच्या तुलनेत भारतीय रुपया घसरत असल्यामुळे आयात खर्चात वाढ होतानाच वित्तीय तूट वाढीची भीती आहे.
------------------------
रुपयाची घसरण सुरूच
अमेरिकी डॉलरच्या तुलनेत भारतीय रुपयातील घसरण सुरूच असून सोमवारी दोनवर्षांची नीचांकी कामगिरी नोंदवत रुपया ३६ पैशांनी पडत ६६ रुपये ८२ पैशांवर पोहोचला आहे. यामुळे जीवनावश्यक आणि दैनंदिन अशा सुमारे ९० वस्तूंवरील आयात खर्चात वाढ झाली आहे. यामुळेही महागाईच्या आगीत तेल ओतले जात आहे.
-------------------------------
सेन्सेक्सची उतरंड
जागतिक कारणांसोबत देशी कारणांमुळे गेल्या १५ दिवसांत सेन्सेक्समध्ये जोरदार घसरण सुरू असून सोमवारी तर सेन्सेक्सने एक वर्षापूर्वीची पातळी गाठली. २६ मे २०१४ या दिवशी म्हणजे पंतप्रधानपदी मोदी विराजमान झाले त्यादिवसाची पातळी सोमवारी सेन्सेक्सने गाठली.