ऑनलाइन लोकमत -
नवी दिल्ली, दि. 11 - समाजवादी पक्षाच्या खासदार आणि अभिनेत्री जया बच्चन यांनी राज्यसभेत लक्ष न दिल्यास जांभळ्या रंगाचं जॅकेट घालून येण्याची धमकीच दिली आहे. राज्यसभा उपाध्यक्ष पी जे कुरियन यांनी आपल्याकडे लक्ष देण्याची मागणी करताना जया बच्चन यांनी ही धमकी दिली आहे.
उत्तराखंड बजेटच्या मुद्यावर राज्यसभेत सत्ताधारी भारतीय जनता पक्ष आणि विरोधकांमध्ये गदारोळ सुरु असताना राज्यसभा उपाध्यक्ष पी जे कुरियन त्यांना शांत करण्याचा प्रयत्न करत होते. यावेळी जया बच्चन यांनी आपली नाराजी व्यक्त केली.
'तुम्ही सिताराम येचूरी यांच्याशी बोलण्यात व्यस्त आहात, माझं ऐका...इतर पक्षांसोबत हा न्याय नाही, फक्त इतर पक्षातील लोक जोराने बोलत नाहीत, ओरडत नाहीत आणि सभागृहाच्या कामात अडथळा आणत नाहीत त्यामुळे त्यांच्याकडे लक्ष दिलं जात नसल्याचं', जया बच्चन यांनी म्हटलं आहे.
'गेल्या तीन सत्रांपासून मी महिला कल्याणावर बोलण्याची मागणी करत आहे, मात्र मला कोणताच प्रतिसाद मिळालेला नाही. उद्या मी जांभळ्या रंगाचा जॅकेट घालणार आहे जेणेकरुन तुम्ही माझ्या उपस्थितीची नोंद घ्याल. तुम्ही आमच्याकडे लक्षच देत नाही. तुम्ही आमचं ऐकत नाही कारण तुम्ही काँग्रेसचे नवे नेते सिताराम येचुरी यांच्याशी बोलण्यात व्यस्त असता', असं जया बच्चन यांनी म्हटलं आहे.