तीन दिवसांत फक्त तीनच अर्ज दाखल

महापालिका निवडणुकीसाठी सुरू करण्यात आलेल्या १४ क्षेत्रीय कार्यालयांपैकी २७ जानेवारीपासून तीन दिवसांत दोन क्षेत्रीय कार्यालयांमध्ये अवघे तीन उमेदवारांचे अर्ज दाखल झाले आहेत

पुणे : महापालिका निवडणुकीसाठी सुरू करण्यात आलेल्या १४ क्षेत्रीय कार्यालयांपैकी २७ जानेवारीपासून तीन दिवसांत दोन क्षेत्रीय कार्यालयांमध्ये अवघे तीन उमेदवारांचे अर्ज दाखल झाले आहेत. चार प्रमुख राजकीय पक्ष उमेदवारांच्या याद्या जाहीर करीत नसल्यामुळे सध्या तरी सर्व क्षेत्रीय कार्यालयातील निवडणूक निर्णय अधिकाऱ्यांना दुपारी ३ वाजेपर्यंत फक्त बसून राहावे लागत आहे. आॅनलाईन अर्ज दाखल करणे किचकट असल्याचीही चर्चा इच्छुकांमध्ये आहे.भवानी पेठ क्षेत्रीय कार्यालयामध्ये शनिवारी सूर्यकांत आंदेकर यांचा एक अर्ज अपक्ष म्हणून दाखल झाला आहे. प्रभाग क्रमांक १८ क मध्ये त्यांनी हा अर्ज दाखल केला आहे. याच कार्यालयात जॉन्सन कोल्हापूरे यांनी प्रभाग क्रमांक २० ड साठी रविवारी अर्ज दाखल केला. टिळक रस्ता क्षेत्रीय कार्यालयात शनिवारी दुपारी संतोष चाकणकर यांनी प्रभाग क्रमांक ३३ अ साठी अपक्ष उमेदवारी अर्ज दाखल केला आहे. रविवारी सुटीच्या दिवशीही सर्व क्षेत्रीय कार्यालयांचे कामकाज सुरू होते. मात्र भवानी पेठ वगळता एकाही क्षेत्रीय कार्यालयात उमेदवार किंवा त्यांचे कार्यकर्ते फिरकले नाहीत.