यंत्रावर नोंदलेल्या एकमेव मताचीही मोजणी

एखाद्या मतदान यंत्रावर केवळ एकाच मतदाराचे मत नोंदले गेले असले तरी त्याचीही स्वतंत्रपणे नोंदणी केली जावी, असे निवडणूक आयोगाने निवडणूक अधिकार्‍यांना कळविले आहे.

नवी दिल्ली: निवडणुकीत मतदान यंत्रावर नोंदल्या गेलेल्या प्रत्येक मताची मोजणी करणे कायद्याने सक्तीचे असल्याने काही कारणास्तव एखाद्या मतदान यंत्रावर केवळ एकाच मतदाराचे मत नोंदले गेले असले तरी त्याचीही स्वतंत्रपणे नोंदणी केली जावी, असे निवडणूक आयोगाने निवडणूक अधिकार्‍यांना कळविले आहे. एखाद्या मतदान केंद्रावर केवळ एकच मतदार असल्यामुळे किंवा अनेक मतदार असले तरी त्यापैकी फक्त एकानेच मतदान केले म्हणून किंवा आधी वापरल्या जात असलेल्या मतदान यंत्राची क्षमता संपल्यावर नवे यंत्र सुरु केल्यावर त्यावर केवळ एकाच मतदाराने मतदान केल्यामुळे मतदान यंत्रावर एकमेव मताची नोंदणी होण्याची स्थिती निर्माण होऊ शकते. प्रत्येक मतदान यंत्रावर नोंदलेल्या मतांची स्वतंत्रपणे मोजणी केली जाते. त्यामुळे ज्या यंत्रावर एकमेव मत नोंदविले गेले आहे त्या मताची वेगळेपणाने मोजणी केली तर त्या मतदाराने कोणाला मत दिले आहे हे साहजिकच उघड होऊन मतदानाच्या गुप्ततेची भंग होईल. त्यामुळे अशा परिस्थितीत काय करावे, अशी व्चारणा काही मतदारसंघांतील निवडणूक अधिकार्‍यांनी विचारल्यानंतर आयोगाने वरीलप्रमाणे खुलासा केला आहे. यावर आयोगाचे म्हणणे असे की, नोंदले गेलेल्या प्रत्येक मताची मोजणी करणे सक्तीचे असल्याने एखाद्या यंत्रावर एकमेव मत नोंदले गेले असले तरी त्याची मोजणी करण्यावाचून अन्य पर्याय नाही. याआधीही असे केले गेलेले आहे. या एकमेव मताची स्वतंत्रपणे मोजणी केल्याने मतदानाच्या गुप्ततेचा भंग होईलच असे नाही, पण तसे होण्याची शक्यता मात्र आहे. त्या एकमेव मतदाराने मतदान केले तेव्हा मतदान केंद्रावर हजर असलेला एखादा मतदान एजन्टच मतमोजणीच्या वेळी एजन्ट असेल तरच तो एकमेव मतदार कोण व त्याने कोणाला मत दिले याबात गुप्तता न पाळली जाण्याची शक्यता निर्माण होऊ शकते.निवडणूक कर्मचार्‍यांकडून मताची गुप्तता राकण्याची पुरेपूर काळजी घेतली जाते, असे आयोगाने स्पष्ट केले. (लोकमत न्यूज नेटवर्क)