ऑनलाइन लोकमत
कानपूर, दि. 17 - उत्तर प्रदेशमध्ये बॉलिवूडच्या सिनेमाप्रमाणे एक वेगळीच घटना घडली आहे. एका तरूणीने व-हाडींना बंदूकीचा धाक दाखवून भर मंडपातून नवरदेवाचे अपहरण केले आहे. उत्तर प्रदेशातील हमीरपूर जिल्ह्यातील मौदहा गावात ही घटना घडली. पोलिसांनी या प्रकरणाचा तपास सुरू केला आहे.
बांदा येथे एका डॉक्टरकडे अशोक हा कंपाऊंडर म्हणून काम करतो. त्याचं क्लिनिकमध्येच काम करणाऱ्या एका मुलीशी प्रेम होते. दोघांनी एकमेकांना लग्नाचं वचन दिलं होतं. पण याच दरम्यान भवानीपूरच्या एका मुलीबरोबर अशोकचं लग्न ठरलं. मौदहा येथे अशोकच्या लग्नाची तयारी सुरू होती. लग्नाच्या दिवशी अचानक ती तरूणी भरमंडपात बंदूक घेऊन आली. "प्रेम माझ्याशी केलं आणि लग्न दुसरीसोबत करतो? मी हे कधीच सहन करणार नाही," असं म्हणत कोणाला काही समजण्याच्या आत तरूणीने भरमंडपातून अशोकचे कॉलर पकडून त्याला ओढत नेऊन गाडीत कोंबले आणि पसार झाली. या दरम्यान लग्नमंडपातील वीज अचानक घालवण्यात आली होती.
भरमंडपातून एवढ्या लोकांच्या उपस्थितीत एखादी तरूणी एखाद्याचे अपहरण कसेकाय करू शकते? कोणी त्या तरूणाला वाचवण्याचा प्रयत्न केला नाही? असे अनेक प्रश्न पोलिसांना पडले असून तरूणी आणि नवरदेवाच्या संगनमताने हा प्रकार घडल्याचा दाट संशय पोलिसांना आहे. या प्रकरणी अशोकचा भाऊ आणि काही फोटोग्राफर्सना ताब्यात घेण्यात आलं आहे.
पोलिसांनी या प्रकरणाचा तपास सुरू केला असून दोघांचा पोलीस कसून शोध घेत आहेत.