ऑनलाइन लोकमत
जोधपूर, दि. २९ - माझी आई हिंदू तर बाबा मुस्लीम आहेत, म्हणून माझी जात भारतीय आहे असे अभिनेता सलमान खानने न्यायालयात म्हटले आहे. काळवीट शिकार प्रकरणात जबाब नोंदवताना तुझी जात कोणती असा प्रश्न विचारला असता सलमानने हे उत्तर दिले आहे. या प्रकरणातही सलमान खानने निर्दोष असल्याचा दावा केला आहे.
हम साथ साथ है या चित्रपटाच्या शुटिंगदरम्यान अभिनेता सलमान खानने काळवीटची शिकार केल्याचा आरोप आहे. या प्रकरणात बेकायदेशीरपणे शस्त्र बाळगल्याप्रकरणी जोधपूर न्यायालयात सलमान खानवर वेगळा खटला सुरु आहे. या खटल्याची बुधवारी सुनावणी झाली व यादरम्यान सलमान खानने त्याचा जबाब नोंदवला. न्यायालयाने सलमानला जात विचारली असता सलमानने आपण भारतीय असल्याचे सांगितले. सुनावणीच्या वृत्तांकनसाठी गेलेल्या काही प्रसारमाध्यमांनी हे वृत्त दिले आहे. या खटल्यात आपण निर्दोष असून पोलिस व वनखात्याने आपल्याला या प्रकरणात अडकवले असा युक्तिवाद सलमानच्यावतीने करण्यात आला. याप्रकरणाची पुढील सुनावणी ४ मेरोजी होणार आहे. सुनावणी दरम्यान सलमानसोबत त्याची बहिण अलविराही न्यायालयात उपस्थित होती.