दिल्लीतील हॉटेल रूममध्ये अल्पवयीन जोडप्याची आत्महत्या

दिल्लीतील द्वारका भागात असणाऱ्या एका हॉटेलच्या रूममध्ये अल्पवयीन जोडप्याने पंख्याला गळफास लावून आत्महत्या केल्याची घटना घडली आहे.

ऑनलाइन लोकमत

नवी दिल्ली. दि. 15- दिल्लीतील द्वारका भागात असणाऱ्या एका हॉटेलच्या रूममध्ये अल्पवयीन जोडप्याने पंख्याला गळफास लावून आत्महत्या केल्याची घटना घडली आहे. या घटनेच्या प्राथमिक चौकशीनंतर अल्पवयीन जोडप्याने आत्महत्या केल्याचं म्हंटलं आहे. या अल्पवयीन जोडप्यातील मुलगा 17 वर्षाचा असून तो बारावीत शिकत होता तर मुलगी एमबीबीएसच्या पहिल्या वर्षात शिकत होती. ज्या हॉटेल रूममध्ये त्यांनी आत्महत्या केली ती रूम त्यांनी ओयो (OYO) अॅपद्वारे बूक केली होती. या रूममध्ये जबरदस्तीने घुसल्याचे कोणतेही निशाण पोलिसांना मिळाले नाहीत. या प्रकरणाच्या सर्व बाबींची तपासणी सुरू असल्याचं पोलिसांनी सांगितलं आहे. पण या आत्महत्येचं कारण अजूनही अस्पष्ट आहे. द टाइम्स ऑफ इंडियाने ही बातमी दिली आहे. 

द्वारकाच्या सेक्टर 17मधील हॉटेलमध्ये गुरूवारी दुपारी दीड वाजताच्या सुमारास या दोघांनी चेक इन केलं होतं. त्यानंतर ते दोघंही त्याच रूममध्ये होते. दिल्ली पोलिसांना शुक्रवारी संध्याकाळी साडेपाच वाजता या प्रकरणाच्या तक्रारीसाठी फोन आला होता. हॉटेलच्या कर्मचाऱ्यांनी बऱ्याचदा ते दोघं असलेल्या रूमची बेल वाजविली होती. पण दरवाजा न उघडल्याने, रूममध्ये काहीतरी घटना घडल्याचा संशय हॉटेलच्या कर्मचाऱ्यांना आला होता. पोलीस अधिकारी सुरेंद्र कुमार यांच्या सांगण्यानुसार, हॉटेल स्टाफने रूमची अनेक वेळा बेल वाजवली पण कुणीही दरवाजा न उघडल्याने कर्मचाऱ्यांनी हॉटेल मॅनेजरला याची माहिती दिली. त्यानंतर पोलिसांना यासंबंधी कळविण्यात आलं. हॉटेलच्या तक्रारीनंतर पोलिसांनी घटनास्थळी धाव घेत रूमचा दरवाजा उघडला. तेव्हा ते अल्पवयीन जोडपं पंख्याला लटकलेल्या अवस्थेत सापडलं. 

आणखी वाचा

 

UPA सरकारला सरसंघचालकांचं नाव दहशतवाद्यांचं यादीत टाकायचं होतं?

तेजस्वींच्या राजीनाम्याचा प्रश्नच उद्भवत नाही - लालूप्रसाद यादव

गोरक्षेच्या नावे हिंसाचार करणारे नरभक्षक आहेत

दरम्यान या प्रकरणी पोलिसांनी पुढचा तपास सुरू केला असून हॉटेलमध्ये चेकइन करताना दिलेले आयडी कार्ड पोलिसांनी ताब्यात घेतले आहेत. तसंच त्या दोघांच्या घरच्यांना या प्रकरणाची माहिती देण्यात आली आहे. त्या दोघांनी दोरीने गळफास लावून आत्महत्या केली आहे. आत्महत्येची योजना दोघांनी आधीपासून केली असावी, असा अंदाज पोलीस व्यक्त करत आहेत. 

या घटनेतील अल्पवयीन मुलगा जनकपुरीचा राहणार असून तेथील एका खाजगी कॉलेजमध्ये शिक्षण घेत होता. गुरूवारी क्लासला जाण्यासाठी घरातून निघाला आणि सेक्टर 17 मधील मेट्रो स्टेशनवर मुलीला भेटला. गुरूवारी मुलगा घरी न परतल्याने त्याच्या घरच्यांनी पोलिसात तक्रार केली होती.  हॉटेलमध्ये जमा केलेल्या आयडी कार्डच्या माध्यमातून त्या मुलीच्या घरच्यांची माहिती जमा केली जाते आहे. तसंच त्या दोघांचे मोबाइल पोलिसांनी जप्त केले असून कॉल डिटेल्स तपासले जात आहेत. 

कदाचित या दोघांचं प्रेमप्रकरण असून त्यांना सगळ्यांपासून लपवून ठेवायचं होतं, असं मत पोलिसांनी व्यक्त केलं आहे.