ऑनलाइन लोकमत
जबलपूर, दि. २१ - मांस शिजवण्यास नकार दिला म्हणून पतीन पत्नीला जाळून ठार मारल्याची खळबळजनक घटना मध्य प्रदेशमधील जबलपूर येथे घडली आहे. या घटनेत गंभीर जखमी झालेल्या पीडित महिलेचा रुग्णालयात उपचारांदरम्याम मृत्यू झाला असून तिच्या पतीवर खुनाचा गुन्हा दाखल करण्यात आला आहे.
मिळालेल्या माहितीनुसार, जबलपूर जिल्ह्यात राहणा-या शबनमचा पती लियाकत खानने रात्री उशीरा घरी आला आणि त्याने तिला मांस शिजवण्यास सांगितले. मात्र कामामुळे अतिशय थकलेल्या शबनमने मांस शिजवण्यास नकार दिला. यामुळे भडकलेल्या लियाकतने तिला मारहाण करण्यास सुरूवात केली व त्यानंतर तिच्यावर केरोसीन टाकून तिला जिवंत जाळले. शबनमच्या ७ वर्षीय मुलीने आजीकडे धाव घेऊन आई जखमी झाल्याचे सांगितले असता, तिच्या कुटुंबियांनी उपचारांसाठी तिला व्हिक्टोरिया रुग्णालयात दाखल केले. केवळ अपघातामुळे शबनम भाजली, अशी सारवासारव करत लियाकतने आपल्या कृत्यावर पडदा टाकण्याचा प्रयत्न केला. मात्र शबनमने डॉक्टरांना खरा प्रकार कथन केला असता, लियाकत तेथून फरार झाला. डॉक्टरांनी शर्थीचे प्रयत्न करूनही उपचारांदरम्यान शबनमचा मृत्यू झाला. याप्रकरणी पोलिसांनी लियाकतविरोधात गुन्हा दाखल केला आहे.