मनमाडच्या लाचखोर पोलीस कर्मचार्‍यास कोठडी

नाशिक : अपहरणासह बलात्काराचा गुन्हा दाखल न करण्यासाठी संशयिताच्या पित्याकडून दहा हजार रुपयांच्या लाचेची मागणी करून ती घेताना रंगेहाथ पकडण्यात आलेला मनमाडचा पोलीस कर्मचारी आनंदा रामदास शिंपी (रा़ मनमाड) यास एसीबी न्यायालयाने बुधवारी (दि़२१) एक दिवसाची पोलीस कोठडी सुनावली़
मनमाड येथे समोरासमोर राहणार्‍या दोन कुटुंबीयांमध्ये असलेल्या वादातून एका कुटुंबातील युवती बेपत्ता झाली होती़ या मुलीचा शोध घेऊन तिला पोलीस कर्मचारी शिंपी याने पालकाच्या ताब्यात दिले होते़ यानंतर या कुटुंबीयांचा वाद झालेल्या कुटुंबाशी संपर्क साधून या युवतीच्या बेपत्ता होण्यामध्ये तुमच्या मुलाचा सहभाग असल्याचे सांगत मुलावर अपहरणासह बलात्काराचा गुन्हा दाखल न करण्यासाठी शिंपी याने पन्नास हजार रुपयांची मागणी केली होती़
यामध्ये तडजोडीनंतर दहा हजार रुपये देण्याचे ठरले़ मुलाच्या वडिलांनी याबाबत लाचलुचपत प्रतिबंधक विभागाकडे तक्रार केली़ यानुसार पोलीस कर्मचारी आनंदा शिंपी यास मंगळवारी (दि़ २०) नाशिकरोड रेल्वेस्टेशन परिसरात दहा हजार रुपये घेताना रंगेहाथ पकडण्यात आले होते़ (प्रतिनिधी)