बंगळुरू : कर्नाटकातील एच. डी. कुमारस्वामी यांच्या नेतृत्वाखालील जनता दल (एस) व काँग्रेस आघाडीचे सरकार केवळ शुक्रवार सकाळपर्यंतच राहील. नंतर ते निश्चितच कोसळेल, असा दावा भाजपचे नेते व कर्नाटकचे माजी मुख्यमंत्री सदानंद गौडा यांनी बुधवारी केला. सदानंद गौडा हे सध्या केंद्रात मंत्री आहेत.
खरे तर कुमारस्वामी सरकारची अखेर उद्या, गुरुवारी संध्याकाळी लोकसभा निवडणुकांचे निकाल लागताच होणार आहे, असे सांगून सदानंद गौडा म्हणाले की, राज्यात नव्या सरकार स्थापनेची तयारी आता करावीच लागणार आहे. गेले काही महिने सातत्याने भाजप कर्नाटकात सरकार स्थापनेची भाषा करीत आहे. तसेच काँग्रेसचे अनेक आमदार आमच्या संपर्कात असून, आम्ही लवकरच सरकार बनवू, असे भाजपचे प्रदेशाध्यक्ष व माजी मुख्यमंत्री बी. एस. येडियुरप्पा यांनी जाहीरच केले आहे.