तो रबराप्रमाणे वाकवतो शरीर

अनेकांच्या शरीराची लवचिकता पाहून तुम्ही प्रभावित होत असाल, पण आपण इतकी लवचिक व्यक्ती पाहिलीच नसेल. गुजरातमधील सुरत येथील रहिवासी १८ वर्षीय यश शाह याच्याबद्दल आम्ही बोलत आहोत. यश शाह याचे शरीर कमालीचे लवचिक आहे. सामान्य मुलांसारखा दिसणारा यश जेव्हा आपले शरीर हवे तसे वाकवतो तेव्हा पाहणारे थक्क होतात. यश आपले शरीर अगदी रबराप्रमाणे कसेही वाकवू शकतो. त्याचे हे कसब पाहून असे वाटते की, जणू त्याच्या शरीरात हाडेच नाहीत. यश शाह आपली मान १८0 अंशात फिरवू शकतो. आपले हात आणि पाय तर तो पूर्ण ३६0 अंशांत फिरवतो. विशेष बाब म्हणजे तो आपले शरीर असे वाकवतो तेव्हा त्याच्या चेहऱ्यावर कोणत्याही प्रकारे वेदनेचे भाव नसतात. अगदी सहजपणे तो हे सगळे करतो. यशला सुरतेत बहुतांश लोक आता रबर बॉय म्हणूनच ओळखतात. तो सोशल मीडियावरही सतत चर्चेत असतो. त्याचे अनेक व्हिडिओ आजपर्यंत व्हायरल झाले आहेत. यश विज्ञान शाखेचा विद्यार्थी असून, तो इयत्ता बारावीत शिकतो. या कलेसाठी तो अमेरिकेचा कन्टॉर्शनिस्ट डॅनियल ब्राऊनिंग स्मिथ याला आपला आदर्श मानतो. आपले नाव गिनिज बुकमध्ये नोंदविण्याची त्याला महत्त्वाकांक्षा आहे.