संततधार पाऊस, पुराने पूर्व अरुणाचल अंधारात

गेल्या काही दिवसांपासून सुरू असलेल्या संततधार पावसामुळे पूर आणि भूस्खलन झाल्याने अरुणाचल प्रदेशच्या पूर्व जिल्ह्याचा वीजपुरवठा आणि भूसंपर्क खंडित झाला आहे.

 इटानगर : गेल्या काही दिवसांपासून सुरू असलेल्या संततधार पावसामुळे पूर आणि भूस्खलन झाल्याने अरुणाचल प्रदेशच्या पूर्व जिल्ह्याचा वीजपुरवठा आणि भूसंपर्क खंडित झाला आहे. पूर, भूस्खलनामुळे गेल्या पाच दिवसांपासून चीन सीमेला लागून असलेला अनजाव जिल्हा राज्याच्या इतर भागापासून तुटलेला आहे. खुपा आणि हायुलियांगमधील स्वामी कॅम्प येथील पूल आणि रस्त्याचा काही भाग वाहून गेला आहे. जिल्ह्यातील मोमपाणी आणि टिडिंग परिसरात प्रचंड प्रमाणात भूस्खलन झाल्याने जिल्ह्याचा भूसंपर्क तुटला आहे. लोहित जिल्ह्यात गेल्या चार दिवसांपासून सुरू असलेल्या मुसळधार पावसामुळे तेझू आणि टिनसुकिया (आसाम)मधील वाहतूक विस्कळीत झाली आहे. लोहित नदी आणि तिच्या उपनद्यांची पातळी वाढत असल्याने जिल्ह्यात पूर धोका संभवतो आहे. जिल्हा प्रशासनाने प्रत्येक सीमेवरील वस्त्यांना, प्रशासकीय कार्यालय आणि नोडल विभागाला परिस्थितीबद्दल सतर्क केले आहे. उपायुक्त बी.एम. मिश्रा यांनी जिल्ह्यातील अतिसंवेदनशील आणि सखल भागात गस्त घालण्याचे निर्देश अधिकार्‍यांना दिले. संततधार पावसामुळे ३३ केव्ही वीजतारेचे नुकसान झाले; तसेच अनेक वीजखांब वाहून गेल्याने तेझू गावात काळोख पसरला आहे. (वृत्तसंस्था)