शपथविधीसाठी अभेद्य सुरक्षा व्यवस्था

येत्या सोमवारी नरेंद्र मोदी यांच्या राष्ट्रपती भवनातील शपथविधी सोहळ्यासाठी सुरक्षेचा अभूतपूर्व बंदोबस्त करण्यात आला आहे़

नवी दिल्ली : येत्या सोमवारी नरेंद्र मोदी यांच्या राष्ट्रपती भवनातील शपथविधी सोहळ्यासाठी सुरक्षेचा अभूतपूर्व बंदोबस्त करण्यात आला आहे़ या दिवशी राष्ट्रपती भवन आणि परिसरात जमिनीपासून आकाशापर्यंत अभेद्य सुरक्षा कडे उभारले जाईल़ गणराज्य दिनाच्या परेडदरम्यान होणार्‍या सुरक्षेच्या धर्तीवर यावेळी सर्वत्र बंदोबस्त ठेवला जाईल़ रायसिना हिल्सस्थित राष्ट्रपती भवनातील मोदींच्या शपथविधी सोहळ्याला पाकिस्तानचे पंतप्रधान नवाज शरीफ यांच्यासह अफगाणिस्तानचे राष्ट्राध्यक्ष हामीद करझई, श्रीलंकन अध्यक्ष महिन्द्रा राजपाक्षे यांच्यासह देश-विदेशातील अनेक अतिविशिष्ट व्यक्ती हजर राहणार आहेत़ त्यामुळे राष्ट्रपती भवनाभोवती अनेकस्तरीय सुरक्षा व्यवस्था ठेवण्यात येणार आहे़ सोहळ्यादरम्यान वायुदलाची सुरक्षा तैनात केली जाईल़ शपथविधी सोहळा संपेपर्यंत राष्ट्रपती भवनाच्या वर आकाशात उड्डाणास बंदी (नो फ्लार्इंग झोन)असेल़ सोहळ्यापूर्वी अनेकदा संपूर्ण परिसराचे हवाई सर्वेक्षण केले जाईल़ एका सुरक्षा अधिकार्‍याने नाव गोपनीय ठेवण्याच्या अटीवर सांगितले की, सुरक्षा यंत्रणांना अधिक सतर्कतेने काम करता यावे, यासाठी सरकारी कार्यालयांना दुपारी १ नंतर सुटी देण्यात येईल़ या संपूर्ण सोहळ्यासाठी पाच हजारपेक्षा अधिक सुरक्षा जवान तैनात करण्यात येतील़ राष्ट्रपती भवनावरील आकाशात या काळात ‘नो फ्लार्इंंग झोन असेल’़ रडारवरून यावर नजर ठेवली जाईल़ हवाई धोक्यांपासून निपटण्यासाठी आजूबाजूंच्या इमारतींवर वायुदलाचे निशानेबाज तैनात राहतील़ दिल्ली पोलीस, निमलष्करी दल, ब्लॅक कॅट कमांडोंचा या ठिकाणी कडक पहारा असेल़ सरकारी सूत्रानुसार, मोदींच्या शपथविधी सोहळ्यासाठी अनेक देशांच्या राष्ट्राध्यक्षांसह सुमारे तीन हजार निमंत्रित उपस्थित राहण्याची शक्यता आहे़ दिल्ली पोलिसांवर गणमान्य अतिथींच्या सुरक्षेचा जिम्मा राहील़ नवाज शरिफ, हामीद करझई आणि राजपाक्षे यांना सर्वोच्च सुरक्षा पुरवली जाईल़ स्वतंत्र पार्किंग व्यवस्था, आत येण्याची आणि बाहेर जाण्याची विशिष्ट व्यवस्था केली जाईल़ (लोकमत न्यूज नेटवर्क)