अरुंधती जीपवर बसल्या तर, कोण दगडही उचलणार नाही - परेश रावल

काश्मिरी युवकाऐवजी अरुंधती रॉय यांना जीपला बांधण्यासंबंधी मी केलेल्या टि्वटचा चुकीचा अर्थ काढण्यात आला.

 ऑनलाइन लोकमत 

नवी दिल्ली, दि. 25 - काश्मिरी युवकाऐवजी अरुंधती रॉय यांना जीपला बांधण्यासंबंधी मी केलेल्या टि्वटचा चुकीचा अर्थ काढण्यात आला. मी चिथावणी देतोय, हिंसाचार करण्याचा माझा उद्देश आहे असे आरोप माझ्यावर करण्यात आले. पण हे सर्व आरोप चुकीचे आहेत. 

 

उलट मी त्या टि्वटमधून शांती संदेश दिला. अरुंधती रॉय काश्मिरींच्या हिंतचिंतक आहेत. त्यांच्या विचारांचे समर्थन करतात. दगडफेक करणारे सुद्धा अरुंधती रॉय यांना मानतात. अरुंधती रॉय जीपवर बसल्या तर, कोणी दगडफेक करणार नाही किंवा दगड सुद्धा हाती उचलणार नाही. त्यामुळे हिंसाचाराचा प्रश्नच मिटेल. 

 

उलट अरुंधती रॉय तिथे गेल्या तर, आपले लष्कर किती प्रतिकुल परिस्थितीत काम करते हे त्यांना समजेल. जेएनयूच्या शहला राशिद आणि काँग्रेस नेते दिग्विजय सिंह यांनी हिंसाचाराची भाषा केली. मी तर, शांतीचे कबुतर सोडले. अरुंधती रॉय तिथे गेल्या तर कोणी दगडफेक करणारच नाही असे मला म्हणायचे होते. पण माझ्या टि्वटचा चुकीचा अर्थ काढला असे परेश रावल यांनी सांगितले. 

 

देशाच्या प्रत्येक नागरीकाने लष्कराचे समर्थन केले पाहिजे. मी भाजपाचा खासदार असलो तरी त्याआधी देशाचा एक नागरीक आहे. उद्या मी खासदार नसलो तरी देशाचा नागरीक राहीन म्हणून मी लष्कराचे समर्थन केले असे परेश रावले म्हणाले. दरम्यान रावल यांचं ट्विटर अकाऊंट ब्लॉक करण्यात आलं आहे. त्यांचं अकाऊंट पाहू शकतो, मात्र ते काही ट्विट करु शकत नाहीत. अरुंधती रॉय यांच्यासंबंधी ट्विट डिलीट केलं नाही तर त्यांचं अकाऊंट ब्लॉक करण्यात येईल अशी सूचना त्यांना ट्विटरकडून देण्यात आली होती. परेश रावल यांनी नकार दिल्यानंतर ट्विटरने ते ट्विट डिलीट करत अकाऊंट ब्लॉक केलं आहे. 

 

हे फक्त माझं एक ट्विटर अकाऊंट आहे, भारतीय पासपोर्ट नाही", असं परेश रावल बोलले आहे. मायक्रो-ब्लॉगिंग वेबसाईटने आपल्याला अकाऊंट ब्लॉक करण्याची धमकी दिली होती असा दावा परेश रावल यांनी केला आहे.परेश रावल यांचं ते वादग्रस्त ट्विट सध्या त्याच्या अकाऊंटवर दिसत नाही आहे. यावर बोलताना त्यांनी सांगितलं की, "मी अद्यापही माझ्या ट्विटवर ठाम आहे. मी माझं ट्विट डिलीट केलेलं नाही. ट्विटरने ते डिलीट केलं आहे". काश्मीरमध्ये ज्या अधिका-याने दगडफेक करणा-या जमावापासून बचाव करण्यासाठी काश्मिरी युवकाला जीपला बांधून मानवी ढालीसारखा वापर केला, त्या अधिका-याने युवकाऐवजी अरुंधती रॉय यांना जीपला बांधायला हवे होते असे टि्वट परेश रावल यांनी केले होते.