अशोक अढाव यांच्या याचिकेवरील सुनावणी तहकूब

हायकोर्ट : पुढील तारीख २१ ऑगस्ट

नागपूर : मेडिकल कौन्सिल ऑफ इंडिया (एमसीआय)वर प्रत्येक राज्यातून एक सदस्य निवडून पाठविला जातो. महाराष्ट्रासाठी झालेल्या निवडणुकीत मुंबई येथील कॉलेज ऑफ फिजिशियन्स ॲन्ड सर्जन्सचे संचालक डॉ. गिरीश मैंदिरकर विजयी झाले आहेत. याविरुद्ध इंडियन मेडिकल असोसिएशनचे माजी राष्ट्रीय अध्यक्ष डॉ. अशोक अढाव यांनी दाखल केलेल्या रिट याचिकेवरील सुनावणी मुंबई उच्च न्यायालयाच्या नागपूर खंडपीठाने सोमवारी २१ ऑगस्टपर्यंत तहकूब केली.
डॉ. अढाव निवडणुकीत पराभूत झाले आहेत. त्यांनी निवडणुकीत गैरप्रकार झाल्याचा दावा करून केंद्र शासनाच्या वैद्यकीय शिक्षण विभागाचे सचिवांसमक्ष निवडणूक याचिका सादर केली आहे. या याचिकेची ३ महिन्यांपर्यंत दखल घेण्यात आली नाही. यामुळे अढाव यांनी उच्च न्यायालयात धाव घेतली आहे. प्रलंबित निवडणूक याचिका तातडीने निकाली काढण्याचे निर्देश देण्यात यावेत अशी त्यांची विनंती आहे. एमसीआय राज्य सदस्यांचा कार्यकाळ ५ वर्षांचा असतो. निवडणूक पोस्टल बॅलेटद्वारे होते. राज्यात ७८ हजारावर मतदार आहेत. निवडणुकीत अढाव यांना सुरुवातीपासूनच अडचणीत आणण्याचे प्रयत्न झालेत. अनुमोदक व सूचक यांच्या नावाखाली त्यांच्या शैक्षणिक पात्रतेचा उल्लेख करण्यात आला नाही असे कारण नमूद करून अढाव यांचे नामनिर्देशनपत्र रद्द करण्यात आले होते. त्यावेळीही त्यांनी उच्च न्यायालयात धाव घेतली होती. उच्च न्यायालयाने नामनिर्देशनपत्र स्वीकारण्याचे आदेश दिल्यानंतर त्यांना निवडणूक लढवता आली. निवडणुकीत मैंदिरकर यांना १२ हजार तर, अढाव यांना ९३०० मते मिळाली आहेत. याचिकाकर्त्यातर्फे ॲड. आनंद परचुरे यांनी बाजू मांडली.