ऑनलाइन लोकमत
नवी दिल्ली, दि. १४ - पंतप्रधान नरेंद्र मोदींनी पाकिस्तानला स्वातंत्र्यदिनानिमित्त शुभेच्छा दिल्या आहेत. जम्मू-काश्मीर व पंजाबमधील गुरूदासपूर येथे पाकिस्तानी दहशतवाद्यांनी केलेला हल्ला यामुळे भारत- पाकिस्तानमधील संबंध कडवट झालेले असतानाही पंतप्रधानांनी सौजन्यपूर्ण शब्दात पाकिस्तानी नागरिकांना शुभेच्छा दिल्या आहेत. 'पाकिस्तानी नागरिकांना त्यांच्या स्वातंत्र्यदिनानिमित्त हार्दिक शुभेच्छा' असे ट्विट मोदी यांनी केले आहे.
दरम्यान आज पाकिस्तानचा व उद्या भारताचा स्वातंत्र्यदिन असतानाही पाकिस्तानच्या कुरापती आजही सुरूच असून पाकिस्तानच्या जवानांनी पुन्हा शस्त्रसंधीचे उल्लंघन करत जम्मू-काश्मीरमध्ये गोळीबार केला.
दरम्यान पाकिस्तानने जम्मू- काश्मीर विधानसभा अध्यक्षांना संसदीय राष्ट्रकुल संघाच्या बैठकीसाठी आमंत्रण देण्यास नकार दिल्याने दोन्ही देशांमधील संबंध आणखी तणावपूर्ण बनले आहेत. पाकिस्तानच्या या निर्णयामुळे भारताने ३० सप्टेंबर ते ८ ऑक्टोबरदरम्यान इस्लामाबादमध्ये पार पडणा-या या संमेलनावर बहिष्कार टाकण्याचा निर्णय घेतला आहे.