ऑनलाइन लोकमत
श्रीनगर, दि. 5 - देशभरात 1 जुलैपासून जीएसटी करप्रणाली लागू झाली आहे. आतापर्यंत जम्मू-काश्मीरमध्ये जीएसटी करप्रणाली लागू झाली नव्ह्ती पण आता जम्मू-काश्मीरमध्येही जीएसटी बिल मंजूर झालं आहे. जम्मू-काश्मीर विधानसभेत मोठ्या गोंधळानंतर जीएसटी बिल मंजूर करण्यात आलं. त्यामुळे आता जम्मू-काश्मीरमध्येही इतर राज्यांप्रमाणे 6 जुलैपासून जीएसटीची अंमलबजावणी होईल.
जम्मू-काश्मीरमध्ये जीएसटीसाठी मंगळवारपासून चार दिवसीय विशेष अधिवेशन बोलावण्यात आलं आहे. अधिवेशनाच्या आजच्या दुस-या दिवशी जीएसटी मंजूर होण्यापूर्वी जम्मू-काश्मीर विधानसभेत मोठा गोंधळ पाहायला मिळाला. नॅशनल कॉन्फ्रन्स, काँग्रेस आणि अपक्ष आमदारांच्या विरोधामुळे गोंधळ निर्माण झाला. गोंधळातच पीडीपी आणि भाजप सरकारला जीएसटी बिल मंजूर करुन घेण्यात यश आलं.
1 जुलैपासून देशभरात ‘एक देश एक कर’ यानुसार जीएसटी करप्रणाली लागू झाली . मात्र जम्मू-काश्मीरमध्ये ही करप्रणाली लागू करण्यात आली नव्हती. त्यामुळे जीएसटी कर प्रणाली लागू न झालेलं जम्मू-काश्मीर हे एकमेव राज्य होतं. संविधानातील कलम 370 नुसार जम्मू-काश्मीरला विशेष राज्याचा दर्जा प्राप्त झालेला आहे. जम्मू-काश्मीरचं स्वतःचं संविधान असल्यामुळे केवळ राज्य सरकारलाच कर वसूली करण्याचा अधिकार आहे. या व्यवस्थेमुळे जम्मू-काश्मीरमध्ये संविधानातील 101 व्या दुरुस्तीला लागू करता येत नाही. आता जीएसटीला मंजुरी मिळाल्यामुळे त्यावर राष्ट्रपतींची स्वाक्षरी होईल आणि 6 जुलैपासून जीएसटी प्रणाली लागू होईल.