ऑनलाइन लोकमत
नवी दिल्ली, दि. 16 - राजधानी दिल्लीमध्ये उझबेकिस्तानच्या 36 वर्षीय महिलेवर सामूहिक बलात्कार झाल्याची घटना उघडकीस आली आहे. दक्षिण दिल्लीच्या मसूदपुर परिसरात ही घटना घडली. याप्रकरणी पीडित महिलेच्या पूर्व प्रेमीला अटक करण्यात आली आहे.
मिळालेल्या माहितीनुसार, 9 आणि 10 मार्चदरम्यान ही घटना घडली पण घाबरलेल्या महिलेने याबाबत तक्रार केली नव्हती. आपल्या एका ओळखीच्या व्यक्तिला महिलेने घडलेल्या घटनेबाबत सांगितलं त्यानंतर त्या व्यक्तिने पोलिसांत तक्रार केली. महिलेचा पूर्व प्रेमी आणि त्याच्या मित्रांनी हे दुष्कर्म केल्याचा महिलेचा आरोप आहे.
महिलेने केलेल्या आरोपानुसार, आधी तिला मारहाण करण्यात आली नंतर बेशुद्ध झाल्यानंतर तिच्यावर सामूहिक बलात्कार करण्यात आला. अनुभव यादव हा तिचा पूर्व प्रेमी आणि त्याचा मित्र गौरव भाटिया अशी आरोपींची नावं असल्याचं महिलेने पोलिसांना सांगितलं तर इतर आरोपींना ओळखत नसल्याचं तिने म्हटलं आहे.
यादव आणि पीडित महिला गेल्या 4 वर्षापासून रिलेशनशिपमध्ये होते पण दोन आठवड्यांपूर्वी त्यांचं ब्रेकअप झालं. त्यानंतर यादव तिला फोन करून धमकावत होता अशी तक्रार महिलेने केली आहे.