सोनसाखळी चोरांना पकडण्यासाठी गेलेल्या पोलिसांवर हल्ला पाच पोलीस जखमी: निरिक्षकांच्या डोळ्यास दुखापत

अंबरनाथ : सोनसाखळी चोरांना पकडण्यासाठी परिमंडळ-४ च्या उपायुक्तांनी तयार केलेल्या पथकावर शनिवारी जीवघेणा हल्ला करण्यात आला. या हल्ल्यात पथकाचे प्रमुख असलेले सहायक पोलीस निरीक्षक गणेश कुंभार गंभीर जखमी झाले असून इतर पाच पोलीस जखमी झाले आहेत.
विठ्ठलवाडी, उल्हासनगर, अंबरनाथ, बदलापूर या परिसरांत होणार्‍या सोनसाखळी चोरीच्या घटनांना आळा घालण्यासाठी परिमंडळ-४ चे उपायुक्त वसंत जाधव यांच्या मार्गदर्शनाखाली हे पथक स्थापन करण्यात आले होते. या गुन्ह्यांमध्ये हवा असलेला आशू युसुफ सय्यद हा अट्टल सोनसाखळी चोर कल्याणच्या मोहने येथील लहुजीनगर झोपडप˜ीत असल्याची माहिती मिळाल्यानंतर या पथकाने शनिवारी रात्री त्याला पकडण्यासाठी या ठिकाणी कोम्बिंग ऑपरेशन केले. यात आशूसह त्याच्या तौफिक सय्यद, शब्बीर सय्यद, असमी दारा सय्यद आधि आपे दारा या त्यांच्या साथीदारांनाही पोलिसांनी ताब्यात घेतले. मात्र, आशूव्यतिरिक्त उर्वरित चोरटे पोलिसांशी झटापट करून निसटले. यानंतर, त्यांचा शोध घेत असतानाच हे सर्व जण मोठ्या जमावासह पोलिसांवर चालून आले. त्यांनी तलवारी, लोखंडी रॉड, मोठे दगड यांच्या साहाय्याने पोलीस पथकावर हल्ला करून जबर मारहाण केली.
या घटनेत पथकाचे प्रमुख सहायक पोलीस निरीक्षक कुंभार हे गंभीर जखमी झाले. त्यांच्या डोक्याला आणि डोळ्याला गंभीर दुखापत झाली असून त्यांच्यावर अंबरनाथ येथील खाजगी रुग्णालयात उपचार सुरू आहेत. ते सध्या अंबरनाथच्या शिवाजीनगर पोलीस ठाण्यात कार्यरत आहेत.
या घटनेनंतर कल्याणच्या महात्मा फुले चौक पोलीस ठाण्यात या सर्व हल्लेखोर सोनसाखळी चोरांविरोधात हत्येचा प्रयत्न, सरकारी कामात अडथळा, मारहाण तसेच महाराष्ट्र पोलीस अधिनियमांतर्गत गुन्हा दाखल करण्यात आला आहे. अद्याप, यातील कुठल्याही हल्लेखोराला अटक केलेली नाही.
...........................