ऑनलाइन टीम
बंगळुरु, दि. १८- मेघालय येथील माओवादी संघटनेचा कमांडर फेसबुकमुळे पोलिसांच्या जाळ्यात अडकला आहे. आर.संगमा असे या कमांडरचे नाव असून गेल्या चार महिन्यांपासून तो फरार होता.
मेघालयमधील गारो नॅशनल लिबरेशन आर्मी या प्रतिबंधित माओवादी संघटनेत आर.संगमा हा दोन नंबरवरील कमांडर होता. ही संघटना मेघालयमधील गारो समाजासाठी स्वतंत्र गोरखालँड राज्य व्हावे यासाठी २००९ मध्ये स्थापन झाली आहे. ही संघटना उत्तरपूर्व भारतात खंडणी व बाँबस्फोटांसारख्या गंभीर घटनांमध्ये सक्रीय आहे. संघटनेचा कमांडर आर.संगमा २०१४ मध्ये उत्तरपूर्वेतील डोंगरद-यांमधून पळ काढण्यात यशस्वी झाला होता. यानंतर मेघालय पोलिस त्याच्या मागावर होते. संगमा त्याची पत्नी व दोन मुलांसह बंगळुरु येथे स्थलांतरित झाला होता. खंडणी व गुन्हेगारी कारवायांमधून आलेल्या पैशातून त्याने बंगळुरुत अलिशान घर घेतले होते. यासाठी त्याने सर्व पैसे सासराच्या बँक अकाऊंटवर जमा केले होते.
पोलिसांच्या ससेमिरा चुकवण्यासाठी त्याने बंगळुरुत १० मोबाईल फोन व २० सिमकार्डचा वापर केला. मात्र या दरम्यान संगमाला फेसबुकचे वेड लागले. फेसबुकवर फोटो टाकणे, दररोज स्टेटस अपडेट करायची त्याला सवय जडली. या आधारे पोलिसांनी बंगळुरु पोलिसांच्या मदतीने संगमाचा मागोवा घेतला. अखेरीस सोमवारी त्याला बंगळुरुतील चांदपूरा येथून अटक करण्यात आली.