खासगी कंपन्यांमधील कर्मचाऱ्यांना ऑनलाईन कळेल निवृत्ती वेतनाची रक्कम

ईपीएफओ : वेबसाईटवर लवकरच होणार सोय
नवी दिल्ली : कर्मचारी भविष्य निर्वाह निधी संघटनेतर्फे (ईपीएफओ) लवकरच आपल्या सदस्यांसाठी (कर्मचारी) वेबसाईटवर निवृत्ती वेतनाची रक्कम किती आहे हे बघण्याची सुविधा उपलब्ध करून दिली जाणार आहे. पेन्शन निधीत किती रक्कम जमा केल्यानंतर संबंधित कर्मचाऱ्याला किती निवृत्ती वेतन मिळेल, हे सुद्धा याद्वारे कळणार आहे.
केंद्रीय भविष्य निधी आयुक्त के.के. जालान यांनी यासंदर्भात माहिती देताना सांगितले की, ईपीएफओतर्फे वेगवेगळ्या सेवा ऑनलाईन उपलब्ध करून देण्याची प्रक्रिया सुरू असून एखाद्या सदस्याला किती निवृत्ती वेतन मिळेल हे सुद्धा या माध्यमाने कळू शकेल. निवृत्ती वेतनाची गणना करण्यासाठी किमान पाच आणि जास्तीतजास्त दहा उदाहरणे वेबसाईटवर उपलब्ध करून देण्यात येतील. या आधारे कर्मचारी स्वत: आपल्या निवृत्ती वेतनाचा हिशेब तयार करू शकेल.
कर्मचाऱ्याच्या एकूण उत्पन्नातून (ग्रॉस सॅलरी) भविष्य निधी (पीएफ) कपातीचा मुद्दा तूर्तास सरकारकडे विचारार्थ प्रलंबित असल्याचेही त्यांनी स्पष्ट केले. यासाठी संसदेत कायदा दुरुस्ती करावी लागणार आहे.
डिजिटल सप्ताह सुरू
ईपीएफओने सोमवारी आपला डिजिटल सप्ताह सुरू केला. केंद्रीय कामगार आणि रोजगार विभागाचे सचिव शंकर अग्रवाल यांनी सप्ताहाचे उद्घाटन केले. याचवेळी संघटनेच्या नव्या डिझाईनमधील वेबसाईटचाही शुभारंभ करण्यात आला. ईपीएफओची योग्य दिशेने आगेकूच सुरू असल्याचे अग्रवाल यांनी यावेळी सांगितले. ते म्हणाले की, आता प्रत्येक महिन्याला पीएफ खाते अपडेट केले जाते. नियोक्त्याने त्याच्यावतीने योगदान दिले की नाही हे कर्मचाऱ्याला सहज कळू शकेल. ईपीएफओची व्याप्ती जास्तीतजास्त वाढविण्याचा आमचा प्रयत्न आहे.
संघटनेकडून डिजिटल सेेवेच्या माध्यमाने ईपीएफ योजना वर्ष १९५२, कर्मचारी निवृत्ती वेतन योजना १९९५ आणि कर्मचारी विमा योजना १९७६ ची माहिती देण्यात येईल. ई-गव्हर्नन्सकडून एम-गव्हर्नन्सकडे संघटनेची वाटचाल सुरू आहे. (प्रतिनिधी)