देवपूर येथे महिन्यापासून नळ प

ाणीपुरवठा योजना बंद
पाणीटंचाई : टॅँकर सुरु करण्याची मागणी

देवपूर: सिन्नर तालुक्यातल्या देवपूर येथील नळपाणीपुरवठा योजना महिनाभरापासून बंद आहे. त्यामुळे येथे तीव्र पाणीटंचाई निर्माण झाली असून महिलांना पाण्यासाठी भटकंती करण्याची वेळ आली आहे. येथे तातडीने टॅँकर सुरु करण्याची मागणी ग्रामस्थ व महिलांकडून करण्यात येत आहे.
गेल्या काही वर्षांत सिन्नर तालुक्यात पावसाचे प्रमाण कमी झाल्याने गावाजवळ वाहणारी देवनदी खळाळून वाहिलेली नाही. त्यामुळे परिसरातील भूजलपातळी खोल गेली असून येथील नळपाणीपुरवठा योजनेच्या विहीरीने तळ गाठला आहे. ग्रामपंचायती मार्फत सदर विहीरीचे खोदकाम सुरु करण्यात आले आहे. सार्वजनिक पाणीपुरवठा करणार्‍या विहिरीला पाणी नसल्याने महिनाभरापासून देवपूर येथे नळयोजनेचा पाणीपुरवठा बंद आहे. गावातील ठिकठिकाणच्या कूपनलिकांसह इतर जलस्त्रोतही कोरडेठाक पडले आहेत. या पार्श्वभूमीवर ग्रामपंचायतीने नव्याने खोदलेल्या दोन कूपनलिकाही कोरड्याच निघाल्या आहेत.
त्यामुळे देवपूरकरांना पिण्यासाठी विकत पाणी घेण्याची वेळ आली आहे. खाजगी टॅँकर वितरकाकडून २०० लिटर पाणी घेण्यासाठी ५० रुपये मोजावे लागत आहे. सुमारे चार हजार लोकसंख्या असलेल्या देवपूर गावास पाणी पुरवठा करण्यास ग्रामपंचायत प्रशासन अपयशी ठरले आहे. गावात भीषण पाणीटंचाई निर्माण झाल्यानंतरही प्रशासनाकडून ठोस उपाययोजना केल्या जात नसल्याने ग्रामस्थांनी नाराजी व्यक्त केली आहे.
उन्हाळ्याच्या प्रारंभीच भेडसावू लागलेल्या भीषण पाणीटंचाईवर मात करण्यासाठी सिन्नर पंचायत समितीने देवपूर परिसरात तातडीने टॅँकरद्वारे पाणीपुरवठा करण्याची मागणी ग्रामस्थांनी केली आहे. (वार्ताहर)