ऑनलाइन लोकमत
डेहराडून, दि. ३ - उत्तराखंडमध्ये शनिवारी रात्री जीप दरीत कोसळून झालेल्या अपघातात १० जण ठार झाले. मुसळधार पावसामुळे ही जीप दरीत कोसळली. उत्तराखंडमध्ये पावसामुळे विविध दुर्घटनांमध्ये मरण पावणा-यांचा आकडा आता २५ पर्यंत पोहोचला आहे. डोंगराळ प्रदेश असलेल्या उत्तराखंडमध्ये ढगफुटीमुळे मुसळधार पाऊस कोसळत आहे.
यामुळे विविध ठिकाणी दरडी कोसळल्यामुळे रस्ते वाहतूक बंद झाली आहे. जीप चालक उखडलेल्या रस्त्यावरुन मार्ग काढण्याचा प्रयत्न करत असताना चालकाचे नियंत्रण सुटले व जीप ५०० फूट खोल दरीत कोसळली. रात्री साडेअकराच्या सुमारास ही दुर्घटना घडली.
पण जिल्हा प्रशासनाला पहाटे पाचवाजता या घटनेची माहिती मिळाली. सरकारी मदत पथक पोहचण्याआधीच जवळच्या खुना गावातील स्थानिकांनी मदतकार्य सुरु केले होते. जीपमध्ये एकूण १४ प्रवासी होते. दोन जखमींना नजीकच्या विकासनगर येथील रुग्णालयात दाखल करण्यात आले आहे. दोघे अजून बेपत्ता असून, अन्य दहा प्रवाशांचा मृत्यू झाला.