दहशतवादी संघटनांमध्ये युुवकांच्या भरतीने चिंता

हिजबुल मुजाहिदीनमध्ये नव्याने सुरू झालेली युवकांची भरती यामुळे सुरक्षा प्रतिष्ठानांमध्ये धोक्याची घंटा वाजू लागली आहे.

श्रीनगर/नवी दिल्ली : जम्मू-काश्मिरातील दूरसंचार मनोऱ्यांवर वारंवार होणारे हल्ले आणि दक्षिण काश्मिरातील दहशतवादी संघटनांमध्ये, विशेषत: हिजबुल मुजाहिदीनमध्ये नव्याने सुरू झालेली युवकांची भरती यामुळे सुरक्षा प्रतिष्ठानांमध्ये धोक्याची घंटा वाजू लागली आहे.२६ युवक, मुख्यत्वे दक्षिण काश्मिरातील युवक दहशतवादी संघटनांमध्ये सामील झाले आहेत, असे काश्मीर खोऱ्यात मागील तीन महिन्यांमध्ये घडलेल्या घटनांवरून दिसून येते. दूरसंचार मनोऱ्यांवर अलीकडच्या काळात झालेले दहशतवादी हल्ले हा पाकिस्तानमधील हिजबुल मुजाहिदीनमधील अंतर्गत कलहाचा परिणाम असू शकतो, असे अधिकृत सूत्रांनी म्हटले आहे.तथापि हिजबुल मुजाहिदीनचा प्रमुख सय्यद सलाहुद्दीन याने या दूरसंचार मनोऱ्यांवरील हल्ल्यात आपल्या संघटनेचा हात असल्याचा आरोप फेटाळून लावला आहे. परंतु लष्कर-ए-इस्लाम ही हिजबुल मुजाहिदीनचीच एक शाखा आहे आणि त्याचा स्वयंघोषित कमांडर कयूम नजरवाला याने हे हल्ले घडवून आणल्याची माहिती सूत्रांनी दिली. कयूम हा सोपोरचा रहाणारा असून, तो मागील सहा वर्षांपासून या संघटनेचे नेतृत्व करीत आहे. हिजबुल मुजाहिदीनने एका खासगी दूरसंचार कंपनीच्या दोन मोबाईल मनोऱ्यांवर रिपिटर बसविले होते आणि त्याचा वापर तो आपल्या संघटनेमार्फ संदेश पाठविण्यासाठी करीत होता, असे तपासात आढळून आले आहे. यांपैकी एक रिपिटर सुरक्षा दलांच्या जवानांनी जप्त केले होते. त्यामुळे दहशतवादी संघटना प्रक्षुब्ध झाल्या आणि त्यांनी मनोरा उभारण्यात आलेल्या जमीन मालकाला धमक्या दिल्या. त्यानंतरच संपूर्ण सोपोर जिल्ह्णात दूरसंचार/मोबाईल मनोरे उडविण्याची धमकी देणारे पोस्टर्स लावण्यात आले होते. २३ मे आणि १ जून या दरम्यान सहा मनोऱ्यांवर दहशतवादी हल्ले करण्यात आले आणि त्यात दोन जण ठार व चार जखमी झाले.या संदर्भात आतापर्यंत आठ जणांना अटक करण्यात आली आहे. परंतु एकानेही या हल्ल्याबाबतची माहिती दिलेली नाही. हिजबुल मुजाहिदीनची शाखा असलेल्या लष्कर-ए-इस्लामने दक्षिण आणि उत्तर काश्मिरातून २६ युवकांची भरती केल्याचे वृत्त आहे. या युवकांना अद्याप पाकव्याप्त काश्मिरात दहशतवादी प्रशिक्षणासाठी पाठविण्यात आलेले नसले तरी त्यांना दक्षिण काश्मीरच्या पर्वतीय भागात आणि त्राल व उत्तर काश्मीरच्या जंगलात ग्रेनेड फेकणे, गोळीबार करणे आणि अन्य शस्त्रांचे प्रशिक्षण दिले जात असल्याचे सूत्रांनी सांगितले. श्रीनगर येथे दूरसंचार आॅपरेटर्सवरील हल्ला आणि गेल्या महिन्यात दक्षिण काश्मिरातील सीआरपीएफ जवानाच्या हत्येसाठी हे नव्याने भरती झालेले युवकच जबाबदार असल्याचे समजते. (वृत्तसंस्था)