शहर सिंगल क्राईम बातम्या..

हैदराबाद रोडवरून मालट्रकची चोरी
सोलापूर : हैदराबाद रोडवरील आंध्र रोडवेज येथे लावण्यात आलेला 6 लाखांचा मालट्रक (क्र.एपी-04 व्ही.4250) चोरून नेल्याप्रकरणी अमिर शेख (रा. मद्रिका कडपा, मध्यप्रदेश) याच्या विरुद्ध जोडभावी पेठ पोलीस ठाण्यात गुन्हा दाखल झाला आहे. ही चोरी दि.3 सप्टेंबर रोजी दुपारी 1 वा झाली. या प्रकरणी नुरमहंमद सनाफ सय्यद (वय 32 रा. 8/209-3 बिस्मिल्लानगर, वायएसआर) यांनी फिर्याद दिली असून, तपास सपोनि रणदिवे करीत आहेत.

क्रेनच्या धडकेत दोघे जखमी
सोलापूर : शिवाजीनगर, मोदी येथे म्हाडा बांधकामावरील बांधकामास लागणारे साहित्य चढविणारे टॉवर क्रेन हायगयने चालवून अंबुबाई अनिल आमलेकर व विष्णू प्रकाश शिंदे यांना जखमी केल्याप्रकरणी दोघांविरुद्ध सदर बझार पोलीस ठाण्यात गुन्हा दाखल करण्यात आला आहे. गोकुळदास आत्माराम हजगुंडे (वय 30, रा. म्हाडा), महादेव निवृत्ती कदम (वय 47, रा. पुणे) व बी़जी़ शिर्के कन्स्ट्रक्शन कंपनीचे देखरेख अधिकारी अशी गुन्हा दाखल झालेल्यांची नावे आहेत. या प्रकरणी गंगाराम विश्वनाथ सातपुते (वय 70, रा. शिवाजीनगर, मोदी) यांनी फिर्याद दिली आहे. तपास पोसई गोसडे करीत आहेत.

बोगस नळप्रकरणी दोघांविरुद्ध गुन्हा
सोलापूर : कल्याणनगर येथील घरांसाठी महापालिकेची रितसर परवानगी न घेता पाईपलाईन फोडून बेकायदा नळ घेतल्याप्रकरणी विजयकुमार विनायक पोरडिया, कमलाबाई नवलसिंग गायकवाड यांच्याविरुद्ध विजापूर नाका पोलीस ठाण्यात गुन्हा दाखल झाला आहे. या प्रकरणी मनपा अधिकारी अभिजित बिराजदार यांनी फिर्याद दिली असून, तपास पो.ना. पोळ करीत आहेत.