ऑनलाइन लोकमत
मुंबई, दि. 7 - कॅप्टन अमेरिका सिविल वॉर या चित्रपटाने पहिल्याच दिवशी म्हणजे शुक्रवारी 8.53 कोटी रुपयांचा गल्ला भारतामध्ये गोळा केला असून सगळ्यात जास्त ओपनिंग मिळवणाऱ्या चित्रपटांमध्ये चौथे स्थान मिळवले आहे. जगभरात या चित्रपटाला जबरदस्त प्रतिसाद मिळत असून भारत अपवाद नसल्याचे दिसून आले आहे.
बॅटमन वि सुपरमॅन या इंग्रजी चित्रपटासोबतच ट्रॅफिक व 1920 लंडन या दोन्ही हिंदी चित्रपटांनाही कॅप्टन अमेरिकाने दणका दिला आहे.
स्टीव्ह रॉजर्स आणि टोनी स्टार्क अधिकाऱ्यांकडे स्वत:चे अधिकार गहाण टाकण्याच्या मुद्यावरून समोरासमोर उभे ठाकतात असा या सिनेमाचा प्लॉट आहे. जगभरात या सिनेमाने 261.6 दशलक्ष डॉलर्सची कमाई केली आहे. अमेरिकेमध्ये सर्वाधिक ओपनिंग देण्याच्या बाबतीत सार्वकालिक पाचव्या क्रमांकावर हा सिनेमा असल्याचा अंदाज आहे. कॅप्टन अमेरिकाने ओपनिंगला अमेरिकेत 180 दशलक्ष डॉलर्सची कमाई केल्याचा अंदाज असून यापेक्षा जास्त कमाई ओपनिंगला केवळ स्टार वॉर्स: दी फोर्स अवेकन्स, जुरासिक वर्ल्ड, मार्व्हल्स दी अॅव्हेन्जर्स आणि अॅव्हेन्जर्स: एज ऑफ अल्ट्रॉन या चार चित्रपटांनी केली होती असे वृत्त आहे.