नगरोत्थान रस्त्याचा ठेका आवताडेंकडे धाडसी निर्णय: युनिटीचा फेरप्रस्ताव नाकारला
By admin | Updated: July 7, 2015 22:56 IST
सोलापूर :
नगरोत्थान रस्त्याचा ठेका आवताडेंकडे धाडसी निर्णय: युनिटीचा फेरप्रस्ताव नाकारला
सोलापूर : तत्कालीन आयुक्त चंद्रकांत गुडेवार यांच्या निर्णयाचे समर्थन करीत आयुक्त विजयकुमार काळमपाटील यांनी स्थायी समितीने केलेला ठराव अमान्य करीत नगरोत्थान योजनेतील २७ कोटी २७ लाखांच्या तीन रस्ते कामांचा ठेका आवताडे कन्स्ट्रक्शनला देण्याचा धाडसी निर्णय घेतला आहे. नगरोत्थान योजनेतील २३८ कोटींच्या रस्ते कामांचा ठेका युनिटी कन्स्ट्रक्शनला देण्यात आला होता. रस्त्यांची कामे निकृष्ट झाल्याने तत्कालीन आयुक्त गुडेवार यांनी युनिटीचा ठेका रद्द केला व तुकडे करून रस्त्यांची कामे काढली. दरम्यान त्यांची बदली झाल्यावर स्थायी समितीचे तत्कालीन सभापती बाबा मिस्त्री यांच्या कालावधीत नगरोत्थानमधील उर्वरित रस्त्यांचा ठेका युनिटीलाच द्यावा असा ठराव करण्यात आला. पण आयुक्त काळमपाटील यांनी हा ठराव अमान्य करून रस्त्यांचे नवीन टेंडर काढले. त्यात मुळेगाव रोड ते केकडेनगर, सद्गुरू हॉस्पिटल, विठाई मंदिर ते चेतन फौंड्री, जिल्हा औद्योगिक केंद्र ते होटगी रोड (काम: १0 कोटी ६३ लाख), कस्तुरबा मंडई ते तुळजापूर वेस, कुंभारवेस ते कोंतम चौक (८ कोटी १९ लाख) आणि पुणे रोड ॲम्बेसिडर हॉटेल ते आडवा नळ, शरदचंद्र प्रशाला ते अरविंद धाम, जुना विजापूर नाका ते सोनीनगर, मोदी (८ कोटी ४५ लाख) या कामांचा समावेश आहे. मक्तेदार एस. एम. आवताडे यांनी डीसीआरच्या दरापेक्षा ७.११ टक्के कमी दराने काम करण्याची तयारी दर्शविल्याने करारपत्र करून वर्कऑर्डर देण्याचा विषय आयुक्तांनी शुक्रवारी होणार्‍या स्थायी समितीकडे पाठविला आहे. मंडईचे विभागाचे खाजगीकरण, लोकसेवा हक्क अध्यादेशाच्या अंमलबजावणीसाठी विहित केलेल्या शुल्कास मान्यता देण्याचे विषय सभेसमोर आहेत. कोट...टेंडर प्रक्रियेत डीसीआरपेक्षा ७ टक्के दराने काम करण्यास नवीन ठेकेदाराने तयारी दर्शविली आहे. यात महापालिकेचे हित असल्याने कमी खर्चात काम करणार्‍यास ठेका देण्याचा निर्णय घेतलेला आहे. विजयकुमार काळमपाटीलआयुक्त, महापालिका