ऑनलाइन लोकमत
कोची, दि. २० - 'सक्तीने केलेल्या धर्मांतरास भारतीय जनता पक्षाचा संपूर्ण विरोध आहे' असे भाजपाध्यक्ष अमित शहा यांनी स्पष्ट केले आहे. उत्तर प्रदेशातील सामूहिक धर्मांतराच्या मुद्यावरून संसदेत सुरू असलेला गोंधळ, ठप्प पडलेले कामकाज व त्यामुळे मलिन होत असलेली सरकारची प्रतिमा या सर्वांच्या पार्श्वभूमीवर त्यांनी पक्षाची भूमिका मांडली.
कोची येथे पत्रकारांशी बोलताना त्यांनी धर्मांतराच्या विषयाबाबत मत व्यक्त करत पक्षाची भूमिका मांडली. 'जबरदस्तीने धर्मांतर करण्यास भाजपाचा विरोध आहे. हे सर्व प्रकार थांबवण्यासाठी आम्हाला कायदा करायचा आहे. त्यामुळे स्वत:ला सेक्युलर म्हणवून घेणा-या पक्षांनी या विधेयकास पाठिंबा द्यावा, असे ते म्हणाले.
मात्र यावेळी त्यांनी उत्तर प्रदेशातील सुरू असलेल्या 'घर वापसी' अभियानाच्या मुद्यावर काहीही बोलण्यास नकार दिला. ' हे प्रकरण न्यायालयात असल्यामुळे त्यावर मला काहीही भाष्य करायचे नाही' असे त्यांनी सांगितले.