आसाराम बापूकडे २,३०० कोटींची अघोषित संपत्ती

आसाराम बापूच्या धर्मादाय संस्थांकडे २,३०० कोटी रुपयांची अघोषित मालमत्ता आढळून आल्याने प्राप्तिकर खात्याने या संस्थांना देण्यात येणाऱ्या करसवलती रद्द करण्याची शिफारस केली आहे.

नवी दिल्ली : आसाराम बापूच्या धर्मादाय संस्थांकडे २,३०० कोटी रुपयांची अघोषित मालमत्ता आढळून आल्याने प्राप्तिकर खात्याने या संस्थांना देण्यात येणाऱ्या करसवलती रद्द करण्याची शिफारस केली आहे. आसाराम व त्याच्या अनुयायांनी स्थावर मालमत्ता, म्युच्युअल फंड, किसान विकास पत्र आणि फिक्स डिपॉझिट योजनांत गुंतवणूक करून मोठ्या प्रमाणात मालमत्ता दडविली असल्याचे चौकशीत आढळून आले आहे. आसाराम याच्या आश्रमांनी २००८-०९ पासून २,३०० कोटी रुपयांचे उत्पन्न दडविल्याचे खात्याचे म्हणणे आहे. आसारामच्या कोलकात्यात सात कंपन्या असून, त्या त्याचे भक्त चालवितात. आसारामने कर्जपुरवठा व्यवसायही सुरू केला होता. १९९१-९२ पासून त्याने आतापर्यंत १,४०० हून अधिक लोकांना ३,८०० कोटी रुपयांचे कर्ज वितरण केले आहे. एक ते दोन टक्के व्याजाने हे कर्ज देण्यात आले होते व त्यासाठी हमी म्हणून पोस्ट डेटेड चेक, शपथपत्र आणि जमिनीची कागदपत्रे घेतली होती. आलेल्या देणग्या दडविण्यासाठी या मार्गाचा अवलंब करण्यात आल्याचे आढळून आले आहे. (लोकमत न्यूज नेटवर्क)