ऑनलाइन लोकमत
नवी दिल्ली, दि. १६ - हरयाणाच्या झांज्जर जिल्ह्यात बहादूरगड येथील खासगी रुग्णालयाच्या अतिदक्षता विभागात शनिवारी नुकत्याच प्रसूत झालेल्या महिलेबरोबर लैंगिक जबरदस्तीची धक्कादायक घटना घडली होती.
या प्रकरणातील आरोपीची ओळख पटली असून, तो स्थानिक असल्याची माहिती पोलिसांनी दिली. पिडित महिलेच्या घराजवळच तो रहातो असे पोलिसांनी सांगितले. रुग्णालयाच्या सीसीटीव्ही फुटेजमध्ये त्याचा चेहरा स्पष्टपणे दिसत होता. त्यामुळे त्याची ओळख पटवता आली. आम्ही त्याची ओळख उघड करणार नाही कारण तो अजूनही फरार आहे असे पोलिसांनी सांगितले.
या घटनेपूर्वी पिडित महिला त्याला ओळखत नव्हती याबद्दल आम्ही ठाम आहोत असे पोलिसांनी सांगितले. शनिवारी सकाळच्यावेळी आरोपी डॉक्टरच्या वेशात महिलेच्या खोलीत आला होता. पीडित महिलेला सुरुवातीला डॉक्टर तपासणी करत आहे असे वाटले.
मात्र जेव्हा डॉक्टरचा चुकीचा इरादा लक्षात येताच तिने आक्षेप घेतला. त्यानंतर आरोपी तिथून निघून गेला. शुक्रवारीच पिडित महिलेची सिझरींग ऑपरेशनव्दारे प्रसूती झाली होती.