१८... अपघात

वाहनाच्या धडकेत तरुणाचा मृत्यू
खापा : भरधाव अज्ञात वाहनाने मोटरसायकलला जोरदार धडक दिली. यात गंभीर जखमी झालेल्या तरुणाचा घटनास्थळीच मृत्यू झाला. ही घटना सावनेर तालुक्यातील खापा पोलीस ठाण्याच्या हद्दीत येणाऱ्या खैरी (पंजाबराव) शिवारात बुधवारी रात्री ७ वाजताच्या सुमारास घडली.
शंतनू विकास बुरडे (२१, रा. खापा, ता. सावनेर) असे मृत तरुणाचे नाव आहे. शंतनू हा एमएच-४०/झेड-१६०२ क्रमांकाच्या मोटरसायकलने खाप्याहून खैरीकडे जात होता. दरम्यान, खैरी गावानजीक भरधाव अज्ञात वाहनाने त्यांच्या मोटरसायकलला उडविले. यात तो गंभीर जखमी झाला. तो जखमी अवस्थेत बराच वेळ रोडवर पडून होता. मात्र, येणाऱ्या - जाणाऱ्यांपैकी कुणीही त्याला मदत केली नाही. त्यामुळे काही वेळातच त्याचा मृत्यू झाला. या संदर्भात नागरिकांनी खापा पोलीस ठाण्याला माहिती दिली. माहिती मिळताच खापा पोलीस घटनास्थळी पोहोचले. त्यांनी मृतदेह ताब्यात घेत पंचनामा केला. या प्रकरणी खापा पोलिसांनी अज्ञात वाहनचालकाविरुद्ध गुन्हा नोंदवून तपास सुरू केला आहे. (प्रतिनिधी)
***
वृद्धाचा मृतदेह आढळला
नागपूर : हिंगणा पोलीस ठाण्याच्या हद्दीतील डोंगरगाव परिसरात मंगळवारी सकाळी ८.३० वाजताच्या सुमारास वृद्धाचा मृतदेह आढळल्याने खळबळ उडाली.
मुठ्ठीलाल समरा बहादूर (६०, रा. व्याहाडपेठ) असे मृताचे नाव आहे. त्याचा मृत्यू नेमका कशामुळे झाला, हे कळू शकले नाही. या प्रकरणी हिंगणा पोलिसांनी अकस्मात मृत्यूची नोंद करून तपास सुरू केला आहे.
***
विहिरीत पडून तरुणाचा मृृत्यू
नागपूर : विहिरीत पडल्याने गंभीर जखमी झालेल्या तरुणाचा मृत्यू झाला. ही घटना कुही पोलीस ठाण्याच्या हद्दीतील आकोली येथे मंगळवारी रात्री ८.१५ वाजताच्या सुमारास घडली.
रवींद्र श्रावण तिजारे (३२, रा. आकोली, ता. कुही) असे मृत तरुणाचे नाव आहे. रवींद्र हा गावातील विहिरीत पडला. यात गंभीर जखमी झाल्याने त्याचा विहिरीत बुडून मृत्यू झाला. तो विहिरीत नेमका कसा पडला, हे कळू शकले नाही. या प्रकरणी कुही पोलिसांनी अकस्मात मृत्यूची नोंद करून तपास सुरू केला आहे.
***