अशोकामार्गावर महिलेची सोनसाखळी ओरबाडली

मीनाक्षी विजय साळूंखे (४८, रा.श्रीजी प्राईड,अशोकामार्ग) या बुधवारी संध्याकाळी आपल्या मुलीसोबत परिसरात भाजी खरेदीसाठी गेल्या होत्या. भाजीपाला खरेदी केल्यानंतर पायी घरी परतत असताना येथील महाराष्ट्र बँकेजवळ मारूती सुझुकी शोरूमसमोरून पायी जात असताना पाठीमागून आलेल्या दुचाकीस्वार चोरट्यांनी त्यांच्या गळ्यातील सुमारे २३ ग्रॅम वजनाची ६० हजार रुपये किमतीची सोनसाखळी हिसकावून पळ काढला. चालू वर्षभरातील ही ९७वी सोनसाखळी चोरीची घटना आहे. यापूर्वीही अशोकामार्गावर सोनसाखळी, मोबाइल चोरीच्या घटना घडल्या आहेत. ज्या ठिकाणी ही घटना घडली तेथून स्मार्ट पोलीस चौकी काही मीटर अंतरावर आहे. ही पाेलीस चौकी स्मार्ट जरी असली तरी या पोलीस चौकीला स्वतंत्र दुरध्वनी आतापर्यंत उपलब्ध झालेला नाही. यामुळे नागरिकांना थेट पोलीस चौकीपर्यंत धाव घेत गुन्ह्याची माहिती द्यावी लागते. पोलीस चौकीला स्वतंत्र दुरध्वनी क्रमांक त्वरित उपलब्ध करुन देण्याची मागणी होत आहे.