तालुक्यातील दापूर व चापडगाव शिवार हा बागायती परिसर आहे. भोजापूर धरणामुळे या भागात पिकांसाठी बारमाही पाणी उपलब्ध असते. त्यामुळे तीव्र उन्हाळ्यात बागायती पिके घेण्यावर शेतकऱ्यांचा भर असतो, तसेच डोंगराळ भाग असल्याने या भागात बिबट्यांचा मोठ्या प्रमाणात वावर असतो. सिन्नर - अकोले रस्त्यालगत चापडगाव शिवारात गट नंबर ५२ मध्ये रेवजी चिमा आव्हाड यांची शेतजमीन आहे. मंगला आगिवले (३७) ही महिला सकाळी शेतात काम करण्यासाठी गेली होती. शेतात बिबट्या झोपलेला असल्याची माहिती आजूबाजुच्या शेतकऱ्यांना दिली. शेतकऱ्यांनाही आश्चर्य वाटले. महिलेने आरडाओरड केल्यानंतरही बिबट्या जागचा हलला कसा नाही. ही महिला गणेश रामनाम आव्हाड यांची शेतजमीन हिश्श्याने करते. परिसरात बिबट्याच्या हल्ल्यात शेतकरी जखमी झाल्याच्या घटना घडलेल्या आहेत. त्यामुळे आसपासच्या शेतकऱ्यांनी दबक्या पावलांनी शेतात प्रवेश केला. पडलेल्या बिबट्याचा अंदाज घेत एकेक पाऊल पुढे टाकले. तरी बिबट्या निद्राधीन. लांबूनच खडाही टाकून पाहिला; मात्र बिबट्याची काहीच हालचाल दिसेना. मग दोन-चार जणांनी धाडस दाखवत पुढे जाऊन शहानिशा केली असता, बिबट्या मृत आढळून आला. शेतमालक आव्हाड यांना याबाबत माहिती देण्यात आली. त्यांनी वन विभागाला कळविल्यानंतर वनपरिक्षेत्र अधिकारी प्रवीण सोनवणे, वनपाल प्रीतेश सरोदे, के. आर. इरकर आदींसह कर्मचारी घटनास्थळी दाखल झाले.
इन्फो...
न्युमोनिया व उपासमारीने मृत्यू
वनपरीक्षेत्र अधिकारी प्रवीण सोनवणे यांना माहिती मिळाल्यानंतर त्यांनी कर्मचाऱ्यांसह घटनास्थळी धाव घेतली. पंचनामा करून दोन वर्षीय मृत मादी बिबट्याला शवविच्छेदनासाठी दोडी येथे हलविले. पशुधन विकास अधिकारी वर्पे यांनी शवविच्छेदन केले. त्यात मादी बिबट्याला न्युमोनिया झालेला आढळून आला. न्युमोनियामुळे तिच्या अंगात शिकार करण्यासाठी त्राण उरले नसावेत आणि त्यातच उपासमार झाल्याने तिचा मृत्यू झाल्याचा वन विभागाचा अंदाज आहे. माळेगाव- मोहदरी येथील वनोद्यानात या मादी बिबट्यावर अग्निसंस्कार करण्यात आले. सहायक वनसंरक्षक अनिल पवार यांनी भेट देऊन घटनेची माहिती घेतली.
===Photopath===
280521\28nsk_42_28052021_13.jpg
===Caption===
बिबट्या