खाल्ली मिसळपाव तर बिघडले कोठे?

नाशिक : दुकानाचे शटर नुसते किलकिले केले की पाच हजाराचा, सार्वजनिक ठिकाणी मास्क न लावल्यास हजार रुपये दंड तर नियम डावलून उपहार गृह सुरू ठेवल्यास ते कायमस्वरूपी बंद करण्याची शिक्षा आपत्ती व्यवस्थापन कायद्यात नमूद करण्यात आली आहे. अर्थातच गेल्या वर्षभरापासून कोरोना महामारीचा व लॉकडाऊनचा सामना करणाऱ्या प्रत्येक नाशिककरांना आता आपत्ती व्यवस्थापन कायदा तसा चांगला पाठही झाला आहे. तरीही, या कायद्याच्या उल्लंघनाची पावलोपावली घोडचूक करणारे दररोजच पोलीस व महापालिका प्रशासनाला गवसत आहेत. दंड व दंडुक्याचा वापर करून घोडचूक करणाऱ्यांना वेसन घालण्याचे काम अविरत केले जात असून, त्यात फक्त शहरातील जनताच बेदरकार आहे, असे नव्हे तर ग्रामीण भागातदेखील या कायद्याचा आधार घेऊन ग्रामसेवकांकरवी जिल्हा परिषदेमार्फत कारवाई केली जात आहे. हे सारे सांगण्याचे तात्पर्य इतकेच की, वर्षभरापासून अस्तित्वात असलेल्या आपत्ती व्यवस्थापन कायद्याचा वापर करण्याचे अधिकार ज्या घटना व्यवस्थापकांना प्रदान करण्यात आले आहेत, त्यांच्या समक्षच या कायद्याचे सर्रास उल्लंघन करण्याचे धाडस सहसा कोणी न्यायप्रिय व्यक्ती करूच शकणार नाही. तसे केल्यास त्याची कोणतीच खैर राहणार नाही, हे नव्याने सांगायला नको; परंतु या कायद्याची अंमलबजावणी करण्यासाठी कायद्याच्याच रक्षकांकडून भररस्त्यात शामियाना उभारला जात असेल व मुदत टळून गेल्यावरही उपहार गृहचालक झणझणीत मिसळ पाव पुरवित असेल तर त्याचा दोष कोणी कोणाला लावायचा? आयोजकांना, सेवा देणाऱ्यांना की, हा सारा प्रकार उघड्या डोळ्यांनी पाहात त्याचा आस्वाद घेणाऱ्यांना?; परंतु असले प्रश्न पडून काही उपयोग होईल, असे मुळात वाटून घेण्याचे कारण नाही. गेल्या वर्षभरापासून कोरोनाशी दोन हात करण्याचे बळ आपल्या हाताखालील अधिकारी, कर्मचाऱ्यांमध्ये भरण्याबरोबरच जनतेलाही त्याबाबत अवगत करण्याचे काम करणारे, प्रसंगी शासनाकडून कानउघाडणी तर प्रसिद्धी माध्यमांकडून केली जाणारी बोचरी टीका सोसूनही खंबीर राहणाऱ्या अधिकाऱ्यांनी वेळात वेळ काढून लालगालिचा, नरम नरम खुर्च्या, आकर्षक कनातीचा मंडपात बसून मिसळचा आस्वाद घेतला तर बिघडले कोठे? लॉकडाऊनच्या काळात जारी करण्यात आलेल्या आपत्ती व्यवस्थापन कायद्याचे उल्लंघन अधिकाऱ्यांनी नव्हे तर त्यांच्यासाठी सोय करणाऱ्या हाताखालच्या यंत्रणेने केले आहे, बोल लावायचे तर त्यांनाच लावावे लागेल. अधिकारी फक्त निमित्तमात्र होते!