दारूचे व्यसन सोडविण्यास गेले ; परतताना रस्त्यात मृत्यूने गाठले

दारूचे व्यसन सोडविण्यासाठी गेलेल्या दोघा संख्या भावंडांचा वणी येथून दुचाकीवर घरी परतत असताना मुंबई आग्रा महामार्गावर गरवारे पॉईंट समोर उड्डाणपुलावर अज्ञात वाहनाने धडक दिल्याने दोघांचाही जागीच मृत्यू झाल्याची दुर्दैवी घटना शुक्रवारी (दि.१७) घडली आहे.

ठळक मुद्दे गरवारे पॉईंटजवळ उड्डान पुलावर भीषण अपघात अज्ञात वाहनाच्या धडकेत दोन भावांचा जागीच मृत्यू

नाशिक : दारूचे व्यसन सोडविण्यासाठी गेलेल्या दोघा संख्या भावंडांचा वणी येथून दुचाकीवर घरी परतत असताना मुंबई आग्रा महामार्गावर गरवारे पॉईंट समोर उड्डाणपुलावर अज्ञात वाहनाने धडक दिल्याने दोघांचाही जागीच मृत्यू झाल्याची दुर्दैवी घटना शुक्रवारी (दि.१७) घडली. पोलिसांनी दिलेल्या माहितीनुसार, इगतपुरी येथील गोरख लक्ष्मण जाधव (३५ )व त्याचा लहान भाऊ सोमनाथ लक्ष्मण जाधव ( २५) हे दोघे भाऊ शुक्रवारी (दि. १७) सकाळी आठ वाजेच्या सुमारास इगतपुरी येथून वणी येथे त्यांच्या दुचाकी (एमएच १५, डीपी ४२१४ ने गेले होते. गोरख चा लहान भाऊ सोमनाथ यास दारूचे व्यसन असल्याने त्याचे व्यसन सोडविण्यासाठी दोघे भाऊ वणी येथे गेले होते. तेथील व्यसनमुक्ती करणाऱ्या बाबाला भेटून दोघे भाऊ त्यांच्या दूचाकीवरून घरी परतत असताना मुंबई-आग्रा महामार्गावर गरवारे पॉईंट जवळील उड्डाणपुलावर सकाळी अकरा वाजेच्या सुमारास त्यांच्या दुचाकीला अज्ञात वाहनाने मागून जोरदार धडक दिली. या अपघातात दोघा भावांचा जागीच मृत्यू झाला असून अंबड पोलीस ठाण्यात अज्ञात वाहन चालकाविरुद्ध गुन्हा दाखल करण्यात आला आहे.