थकबाकी वसुलीला कोरोनाचा अडसर
नाशिक :राज्य वीज वितरण कंपनीने वसुली मोहीम राबविली असली तरी अद्याप अनेक ग्राहकांकडे मोठ्या प्रमाणात वीज बिलाची थकबाकी आहे. ही थकबाकी वसूल करण्यासाठी वीज कंपनीकडून प्रयत्न केले जात असले तरी कोरोनाच्या संकटामुळे विविध अडचणींचा सामना करावा लागत आहे.
इतर आजारांच्या रुग्णांचीही गैरसोय
नाशिक : कोरोनामुळे इतर आजारांच्या रुग्णांचीही स्थिती गंभीर झाल्यास बेड मिळणे अवघड झाले आहे. अनेक रुग्णालयांनी कोविड वॉर्ड सुरु केलेले असल्यामुळे इतर आजारांच्या रुग्णांना डॉक्टरांच्या सल्ल्याने घरीच उपचार घ्यावे लागत असल्याचे चित्र सध्या पाहायला मिळत आहे.
भाजी विक्रेत्यांच्या संख्येवर परिणाम
नाशिक : लॉकडाऊनमुळे शहरातील फिरत्या भाजी विक्रेत्यांची संख्या खूपच कमी झाली असल्याचे दिसते. यामुळे अनेक परिसरातील महिलांना सकाळी या विक्रेत्यांची वाट पहावी लागते. किरकोळ विक्रेत्यांना बाजार समितीतून माल मिळणेही कठीण झाले आहे.
काळाबाजार करणाऱ्यांविरुद्ध कारवाई
नाशिक : कोरोनावरील औषधांचा होणारा काळाबाजार रोखण्यासाठी अन्न आणि औषध प्रशासन विभागाने कार्यवाही सुरु केली असून औषधांचा काळाबाजार करणाऱ्यांवर गुन्हा दाखल करण्यात येत आहे. या कारवाईमुळे काळाबाजार करणाऱ्यांना चाप बसेल असा विश्वास व्यक्त केला जात आहे.
अंगणवाडी सेविकांना सुविधा देण्याची मागणी
नाशिक : कोरोना काळात जीव धोक्यात घालून सर्वेक्षणाचे काम करणाऱ्या अंगणवाडी सेविकांना सोयी सुविधा पुरविण्याची मागणी केली जात आहे. अनेक अंगणवाडी सेविकांना मास्क, सॅनिटायझर आदी वस्तूंची कमतरता भासते. यामुळे नाराजी व्यक्त केली जात आहे. सध्या अंगणवाडी सेविकांमार्फत कोविड सर्वेक्षणाची कामे सुरु आहेत.
उघड्यावर राहणाऱ्यांचे लसीकरण करा
नाशिक : शहरातील विविध भागात उघड्यावर राहणाऱ्या गोरगरिबांचे लसीकरण करण्यात यावे अशी मागणी केली जात आहे. अनेक सिग्नलच्या चौकांमध्ये हे नागरिक लहान मुलांसह राहतात. दिवसभर तेथेच भिक मागतात यामुळे कोरोनाचा प्रसार होण्याची शक्यता नाकारता येत नाही. याबाबत चिंता व्यक्त केली जात आहे.
सलग दुसऱ्यावर्षी मंडपवाले अडचणीत
नाशिक : मागील वर्षांपासून विवाह सोहळ्यांवर आलेल्या निर्बंधांमुळे मंडप डेकोरेटर्स चालकांना मोठा आर्थिक फटका बसला आहे. सलग दुसऱ्यावर्षीही या व्यावसायिकांना व्यवसाय मिळत नसल्याने त्यांच्याकडे कामाला असलेल्या मजुरांना सांभाळायचे कसे असा प्रश्न त्यांच्यासमोर निर्माण झाला आहे.
कोरोनामुळे घरच्या घरीच दशक्रिया विधी
नाशिक : कोरोनामुळे रामकुंडावर जाऊन दशक्रिया विधी करणाऱ्यांची संख्या घटली आहे. दशक्रिया विधीसाठीही उपस्थितीची मर्यादा असल्याने अनेक नागरिक घरच्या घरीच पूजाविधी करून दशक्रिया विधी करत असल्याने रामकुंडावर होणारी गर्दीही कमी झाली आहे.
कोरोनाचा त्र्यंबकेश्वरच्या अर्थकारणावर परिणाम
नाशिक : त्र्यंबकेश्वर येथे विविध धार्मिक विधींसाठी देशभरातून येणाऱ्या भाविकांची संख्या एकदमच कमी झाल्याने येथील अर्थकारणावर त्याचा मोठा परिणाम झाला आहे. अनेक छोट्या मोठ्या व्यावसायिकांचे व्यवसाय बंद झाले आहेत. यामुळे त्यांच्यासमोर आर्थिक समस्या निर्माण झाल्या आहेत.
पर्यटन स्थळ परिसरातील व्यवसाय बंद
नाशिक : शहर परिसरातील निसर्गरम्य ठिकाणी येणारे पर्यटक बंद झाल्याने या परिसरातील सर्व व्यवसाय बंद पडले असून अनेकांना बेरोजगारीचा सामना करावा लागत आहे. लॉकडाऊनमुळे शहराकडे कुणीही फिरकत नसल्याने या परिसरातील हॉटेल व्यावसायिक त्याचबरोबर इतर पूरक व्यावसायिकांचे व्यवसाय बंद झाले आहेत.