अज्ञात वाहनाच्या धडकेने जखमी
नाशिक: गंगापूररोडवरील सुयोजित गार्डनसमेार एका अज्ञात दुचाकीस्वाराने पाठीमागून जोरदार धडक दिल्याने शशिकांत ढिकले (७०) जखमी झाले. सकाळच्या सुमारास ज्येष्ठ नागरिक ढिकले हे फिरण्यासाठी घराबाहेर पडले. सुयोजित गार्डनजवळ अज्ञात दुचाकीस्वाराने त्यांना धडक दिली. घटना घडल्यानंतर दुचाकीस्वार घटनास्थळावरून फरार झाला असून, पोलिसांनी याप्रकरणी गुन्हा दाखल केला आहे.
कारमध्ये बसत असतानाच पोत लांबविली
नाशिक : काळ्या रंगाच्या दुचाकीवर आलेल्या दोघा चोरट्यांनी कारमध्ये बसत असणाऱ्या महिलेच्या गळ्यातील सोन्याची पोत ओढून पलायन केल्याची घटना रविवारी मखमलाबाद रोडवर घडली. योगीता युवराज अहिरराव या मखमलाबाद रोडवरील ड्रीम कॅसलजवळील राधानगर येथे आपल्या कुटुंबासह एका कार्यक्रमासाठी गेल्या होत्या. कार्यक्रम आटोपून रात्री साडेअकरा वाजेच्या सुमारास त्या घरी जाण्यासाठी कारमध्ये बसत असताना मधुबन कॉलनीतून दुचाकीवर आलेल्या चोरट्यांनी त्यांच्या गळ्यातील सुमारे ३४ ग्रॅम वजनाची ९५ हजारांची सोन्याची पोत ओढून पलायन केले. याप्रकरणी पंचवटी पोलिसात गुन्हा दाखल करण्यात आला आहे.
जिल्हा रुग्णालय आवारात एकाचा मृत्यू
नाशिक : जिल्हा रुग्णालय आवारात तोल जाऊन पडलेल्या इसमाचा मृत्यू झाल्याची घटना रविवारी सायंकाळच्या सुमारास घडली. समाधान खंडू पाटील (३४. रा. म्हाडा कॉलनी, अंबड) हे जिल्हा रुग्णालयाच्या आवारात तोल जाऊन पडल्याचे कर्मचाऱ्यांच्या लक्षात आले. कर्मचाऱ्यांनी त्यास उठविण्याचा प्रयत्न केला, मात्र त्यांनी प्रतिसाद न दिल्याने डॉक्टरांना पाचारण करण्यात आले. डॉ. आर. बी. पाटील यांनी तपासले असता ते मयत झाल्याचे त्यांना सांगितले. याप्रकरणी सरकारवाडा पोलिसांत अकस्मात मृत्यूची नोंद करण्यात आली आहे.